MTLT-i Aug 24 nü takhangba agütsüba nungi masetshir

Dimapur, August 28 (TYO): Mokokchung jila nung power timtem atema takhangba agütsübatem nungi masetshii noktaker, ta Mokokchung Town Lanur Telongjem (MTLT)-i tanü metetdaktsü.
Mokokchung nung power dak sendakba khuret ajuruba ya July 15, 2016 nü Power Station Mokokchung nung 5 MVA Transformer raksaba sülen adokba masü saka küm aika jila nung power supply shitak magütsüi aruba public tejashitem bener tang temai adokba lir, ta MTLT-i ashi.
August 24, 2016 nü Mokokchung jila nung electrical office tem shibangtsübaji mapa tetenzüker dang lir. Iba ya Mokokchung jila nung aliba public temi lungkak aitba nung mezüngbuba shilem lir, ta MTLT-isa metetdaktsü.
Parnokisa ashiba agi, Power Department Mokokchung nung ketdangsertemi anir mapa inyakertem ajaki mapang talangka magii dang transformer yangluogo. Ajisüaka, Mokokchung jila nung power tebilemtsü ya kanga tuluka lir aser ibaji Augsut 24, 2016 nü ADC Mokokchung ajanga Power Minister nem agütsüba ‘Demand Charter for Power in Mokokchung’ nung jangjajangja shia lir.
MTLT-i agütsüba ‘Demand Charter’ nung 2015 küm Mokokchung DPDB ajanga Majakong Ward nung power station (10MVA) ka lapoktsü aser Salangtem nung tang aliba sub-station nung 10MVA talila bendenloktsü nangzüka ama inyaktsü shia lir, ta MTLT-isa nenshia metetdaktsü.
Jila nung power supply tiptema angutsü atema bangdakpurtem aser luden züngsemtemi  Electricity Act, 2003 nung Arla 166 mapa küma inyaktsü shia lir, ta paisa ashi.
MTLT-isa Mokokchung Power Division nung 2014-15 atema sen lakh 50 shi mapa inyaktsü sen agütsüba indang utilisation certificate sayutsü takhangba agütsü. Iba ya August 24, 2016 nungi tenzüker anogo tenetnü tsüngda agütsütsü atema mapang latetja lir, ta metetdaktsü.
State sorkar mesüra Power Minister-i tezüluba nung temenangzükba ka magütsüra, iba onük ya tuluba akümtsü aser tensa mejungi kümra, iba tebilemtsü khuretji Power Department-i abentsü,
Sorkari mapa inyaktsü ta tamang nung 2015 nungi onoki kanga aremzüka ataa aruogo saka onoki agütsüba temepishibatem, tezülubatem aser takhangbatem ajak hao ta melii toktsü. Iba jagi MTLT-i mapa inyaktsüsa aküm aser iba tebilemtsü ya sorkar aser power department-i dang abentsü, ta parnokisa ashi.
Ano, All Ward Union Mokokchung (AWUM)-i Mokokchung jila atema transmission line balaka agütsütsü takhangba agütsüba aser July 2016 nungi tenzüka sorkar nem electricity bill magütsüi atatsü lemtetba onokia pusema nungiter, ta MTLT-isa nenshia metetdaktsü.