MTLT-i Department of Power ajungmesor

Dimapur, August 7 (TYO) : Mokokchung jila nung alirtem power manguba timtem indang Mokokchung Town Lanur Telongjem (MTLT)-i Department of Power nem tezüluba ka nung metetdaktsü.
Department of Power-i terenlok mapa kanga meilongi inyakba ngua public-i joko maremzükteti 2015 küm ozüng alema mapa inyaktsüsa aküm. Public-i tejashi sayua lokti sentong balala ayongzüka agiogo anungji Department-i public memesüshitsüla, ta MTLT Tir, Imkummeren Jamir aser Tongti Tezülur, Taliakum Pongen nati külem sangdong nung shia lir.
Department of Power indang mission & vision statement “POWER TO ALL ON DEMAND” nung ajemdaker MTLT-i yaküm Mokokchung nung alirtem nem power supply peria agütsütsü atema nüngdakba machineries/equipment enoktsü atema takhangba agütsü. Ajisüaka, tanü tashi temelenshi kecha maliba angudang temulung raksar, ta MTLT sangdong nungsa shia lir.
Parnokisa ashiba agi, Nov. 21, 2015 nü Sub-Divisional Officer, Electrical Sub-Division, Mokokchung-i sangdong ka ajanga metetdaktsüba nung, parnoki temapur ketdangsertem dang Mokokchung nung nüngdakba ajak metetdaktsüogo ta shia liasü.
Mecavo Power Works Dimapur kübok Crompton Greaves Ltd Calcutta nungi technician telok kati November 21, 2015 nü 33/11KV RESS Mokokchung nung survey asüdang teraksa aser yanglushitsü nüngdakba aika ajitetba kuli agütsüogo. Anungji itemji tekaratiba nung melentsü/yanglutsü atema MTLT-i takhangba agütsü.
2015 küm MTLT-i Mokokchung nung transformer tasen/stand by ka ayutsü takhangba agütsü saka tang tashi iba telangzüba mengui lir. Mokokchung nung power agir consumer temi bill agüja arudar. Ajisüaka, Mokokchung sub-division office ajanga ashiba agi, maintenance fund mali. Anungji, iba dak sendakba nung department-i sen koma amshir’ar public-i metetnür, ta MTLT-isa asüngdang.
Repair maparen takok ngua meinyaktetbaji bill agütsüba consumer tem tamakok ajanga masü saka sorkar aser department tamakok ajanga lir, ta  parnokisa shisem.