MTLT-i Medical Minister dang pelar

Dimapur, December 4 (TYO): Imkongliba Memorial district Hospital, Mokokchung (IMDH) nung shiranga amungertem tajungba nung anepalutsü atema ashiba ama Department of Health & Family Welfare Department-i mapa inyakba atema kanga pelar ta Mokokchung Town Lanur Telongjem (MTLT)-i metetdaktsü.
IMDH nung pediatricians aser gynecologists kanga nüngdaka liasü aser iba ya department tongtipang rongnung ana lir. November 17, 2017 nü MTLT ketdangpurtem Kohima-i ao aser idakji Medical Minister nem par kidang ajurutepa IMDH nung tang nüngdakba khurettem lemsatep, ta MTLT Imkummeren Jamir aser Grievances Cell, Convener Aolong Imchen nati sangdong ka nung ashi.
Medical Minister, Imkong L Imchen-i nübortemi ola adokba angashia pediatricians aser gynecologist takotettem IMDH nung mapa lemzüktsüba atema pa dang kanga pelar, ta MTLT ketdangpurtemisa ashi.
IMDH nung aliba department balala nung nübo tajungtem mapa lemzültsüba ajanga shirangertem kanga ajangzüktsü ta bilemer. Maneni MTLT-isa IMDH nung aliba doctor aser nurse tem dang kanga pelaba shisemer, ta sangdong nungsa metetdaktsü.
IMDH nung doctor, nurse aser staff temi maneni pei tajungtiba agi nübortem tenzükdaktsünür ta MTLT-isa mepishia metetdaktsü.