MTLT-i Nagaland Angh nem temepishiba balala agütsü

Mokokchung, November 17 (TYO): Mokokchung Town Lanur Telongjem (MTLT)-i Nagaland Angh, PB Acharya dang Mokokchung jila nung nüburtemi ajangshiba timtem balala metetdakja temepishiba balala agutsüogo, ta MTLT Tir, Imkummeren Jamir aser Tongti tezülur, Taliakum Pongen nati tanü sangdong ka ajanga metetdaktsü.
Imkongliba Memorial District Hospital (IMDH) dak sentakba nung MTLT-i state Angh dang, IMDH nung mamshii aliba Ultrasound aser ECG oset amshitsü atema technician kaka shimtsüla, CT scan mejungi aliba yanglushitsüla mesüra tasen melentsüla, iba den külemi tekaraba nung ICU ka amenoktsüla ta mepishi.
Parnokisa, tang gynecologists ka dang lir anungji ano kar shimoktsüla, taküm aika kümzüktsü atema pediatricians shimtsüla aser tekaraba nung Radiotherapy Unit tenzüktsüla, kechiyong cancer agi shiranger timba akumer aser bendanglen sen jenti intoka teyari agir, ta Angh nem metetdaktsü.
PHED dak sentakba nung MTLT-i, jila nung tzü agir tesadang katibo tzü khenyongi menguaka meter sen agütsür; Jila nung kibong 30,000 shi nungi tzü pipeline connection agia alir kibong 2460 dang lir, aser iba ya kibong shilem 10 den ishiba lir, ta metetdaktsü.
Kasa onük nung parnokisa, Salangtem ward nung aliba pump house nung tank ka lir aser yangji tzü teti moshia yimdoker, anungji jila tesem balala nung aliba reservoirs nung tzüji pump asütsü atema inyakdaktsüner, ta Angh dang parnoki mepishi.
Mokokchung-Mariani National Highway 702D ya Mokokchung atema kanga tongtibang, aser state nung kanga mazüngi aliba lenmang tanabuba jenjang nung lir. Iba lenmang ya NH ta sangdongogo, anungji Centre nungi nübo ka ama nai khuret agia inyakdaktsünür, ta MTLT-i mepishi.
Shisaliok dak sentakba nung MTLT-i, Mokokchung ya shisaliok tiyongtsü ka lir. Nagaland nung sorkar college tejentibaji Fazl Ali College süaka tang tashi tan putu den apet kaketnang mali, anungji FAC nung kaketnang jenjang ajungketdaktsünür, ta mepishi. MTLT-isa, Mangkolemba aser Changtongya na kanga kera renlokdar aser iba denji sütepa tesem anaprong nung college kaka amenokdaktsüner, ta mepishi. Inter State Bus Terminus (ISBT) ya 2011 küm semzükaka taküm mali den kasa lir, aser district ketdangsertemia tim ketdangser dang ajakji ISBT tasenbai belentsü aiben tetuyuba agütsüogo; jila nung gari senzüba mesüa akumer anungji iba atema inyakdaktsüner, ta MTLT-i Angh dang mepishi.
2015 küm District Planning & Development Board (DPDB)-i agizükba ‘Northern Peripheral Road’ atema tekaraba nung inyaktsüla; Mokokchung town Quasquicentennial Benjungmong mapang Chief Minister, T.R. Zeliang-i DPDB-i benokba “northern ring road” ya kanga nüngdakba ka lir ta sangdongogo, aser paisa iba atemaji Centre sorkar dang senotsü teyari meshitsü ta shiogo. PWD R&B Mokokchung division-i iba atema project renemogo aser sorkar matsüngdang benokogo, anungji iba atema Angh-i rongdak süa inyakdaktsünür, ta MTLT-i ashi.
Küm aika tejaklen YRS dept. kübok yangluba Youth Hostel ya tang tashi mamshi lir aser jila nung saisapong balala nung lanurtem jenti adokdar, anungji iba atema tekaraba nung inyaktsüla; iba den külemi iba ya asangsang kümra anasa aliba kidanger district tema ajangzüktsü, ta MTLT-i ashi.
MTLT-i, Public Distribution System (DBS) ochimashi ya state tesem ajaklen prokshiogo aser Mokokchung nung PDS ochimashi yabo tilaka kakteter dang saka Nagaland sasep nung ochimashi tulu lir, anungji CBI nem tekaraba nung bushisüngdangdaktsütsüla, ta Angh dang mepishi.
Power Department dak sentakba nung MTLT-i, tang power supply atema Mokokchung nüburtemi kanga süokibo ia magir, ajisüaka tamalen sorkari Majakong ward nung sub station tasen ka amenoktsütsü aser Salangtem nung aliba substation jenjang ajungkettsütsü nangzüka lir saka ibaji mapa makümer; Light atsükertem timba akumba aser jila tuluba akümba den lirumedema item project inyaktsü kanga tongtibang, ta mepishi.
Nüburtem aser linük atema item onüktem atema tekaraba nung inyaktsü, ta MTLT-i tamang akar, ta state Angh dang shiogo.