MTLT-i National Highway 702D yanglutsü ayongzüker

Dimapur, June 3 (TYO): Mokokchung Town Lanur Telongjem (MTLT)-i National Highway 702-D (Mariani-Mokokchung lenmang) mejungi aliba atema tebilemtsü abenba metetdaktsüogo.
National Highway 702D ya Mokokchung district nung alirtem atema dang masü saka Tuensang, Zunheboto district tem atema kanga tongtipang lir. Ajisüaka, Chungtia yimtsüng anasa ‘June linen’ ta ajaba anentsüh aluba tesem nung truck gari anishirtemi kanga timtem ajurur, ta MTLT-i ashi.
MTLT ketdagpurtemi ‘June Linen’ tesem semdang aser idakji mapa inyakba department supervisor tem den ajurutepa sensaksemdang iba gari lenmang yanglurtem dang pelaba metetdaktsü.
Iba tongtipang lenmang yangluba maparen nung ali kiburtem- Chungtia aser Aliba yimertemi department den yaritepba osang angashia kanga pelar, ta MTLT-isa metetdaktsüogo.
Iba tesem ya ali anenoka aliba tesem ka lir aser taoba küm 20-30 tashi nübortem nem timtem agüja arur. Taküm-a tzüngluruwa matongdang yongi iba tesem nung lenmang anenka iogo aser mapang shia senzüsenbong mesüteter, ta parnokisa ashi.
Talisa, tang COVID-19 anema rara nung truck garitem ajanga district balalai tongtipang nüngdaktem belener aser iba atema MTLT-i truck driver aser parnok den yaritepertem asoshi tebilemtsü abener. Anungji, PWD (National Highway)-i National Highway 702D atema temulung agüja tekaratiba nung garitem tiptema senzütsüsa yangludaktsünür, ta MTLT-isa metetdaktsü.
Tang ya state sorkari mesüra bangdak department-i timtem ajurubaji meteta lir saka National Highway 702D ama tongtipang lenmang yanglushiba mapa meinyakteter ta asütsü atema tatemtsü kecha mali. Anungji state sorkari iba tesem nung timtem majurutsüsa lenmang paitoktsü mesüra concrete retaining walls yanglutsü ayongzüker, ta MTLT-isa metetdaktsü.