MTLT-i power department dang akhanger

August 31, 2015 nü Mokokchung Town Lanur Telongjem (MTLT) ketdangsertemi Mokokchung Power Station semdangdang agiba noksa ka angur.

Dimapur, August 31 (TYO) : Mokokchung power station nung 5000 MVA transformer raksaba ajanga tesüiba anogo pungu den timba jila nung power timtem kanga ajurua arudar ta Mokokchung Town Lanur Telongjem (MTLT)-i sangdong ka ajanga metetdaktsü.
Anogo ishika Mokokchung jila kübok colony balala nung anogoshia mapang lemsar ghonda pezüzü dang power supply angur. Iba ya ajanga sensosangertem timtem kanga ajurur aser talisa shishilembartem takoksa tulu angur. Shishilembar aika power supply peria manguba ajanga rongsenkettsüng tsütsü sen lakh aika akoksaogo, ta MTLT-i sangdong nung shia lir.
Iba amala rongdak nüngdakba mapang amshitsüsa Power Department ket nung transformer ka maliba angudang kanga aoksar. Nagaland state nung mapa tajungtiba inyakba power division tem rongnung Mokokchung division ya ka ta züngshir aser ibaji dang masü saka Nagaland nung taa timba sarutetba division ji Mokokchung division lir, ta MTLT-isa ashi.
Mokokchung nung alirtemi mapang shitak nung ‘light bill’ agüja arudar aser ano Urban Electricity Management Boards (UEMBs)-ia ita shia pei pei telongtet nung mapang shitak nung sen sarur aser colony nung power auyaa agiba mita repranger. Item onük nung ajemdaker kechiba Power Department-i Mokokchung nung alirtem timtemdaktsür, ta MTLT-i sangdong nung Power Department dang asüngdangogo.
Power department-i Mokokchung nung alirtem khuret angatettsüla aser tekaratiba nung power supply akhi ama agütsütsü akhanger. Tang Mokokchung nung ajuruba timtemji Nagaland kübok tesem mashi ka nung ataloktsü akok anungji power department-i transformer ka mesüra anabo standby nung ayutsüla, ta MTLT-isa metetdaktsü.
5000 MVA power transformer ka indang jenjangji sen lakh 60 shi ka lir aser Mokokchung-i küm shia sorkar senpong nung Rs. 600,00,000 shi enoktsür ta MTLT-i angazükogo. Anungji rongdak mapang nung amshitsü atema sorkari kechiba transformer ka malitteter, ta MTLT-isa asüngdongogo.
Mokokchung power department nung inyakertemi sensopurtem yaritsü atema mapa meranga inyakdar aser parnok nem tenüngsang agütsür. Ajisüaka Power Department-i tekaratiba nung Mokokchung jila nung power supply agütsütsü akhanger, ta MTLT-isa metetdaktsüogo.