MTMK den lokti tentet balalai police aitsü

Dimapur, Rongchii/April 4 (TYO): Medziphema Town Mechü Krotho (MTMK) den Medziphema Town Women Organization, Medziphema Town Youth Organization, Medziphema Town Chamber of Commerce aser Medziphema Town Students’ Union-i, SMO, CHC Medziphema Dr. N. Sezo dak Special Task Force personnel temi kecha kuli melei züka merenshiba kho khoa aitsüogo.
Lokti tentet balala külem sangdong ka ajanga ashiba agi, temzüng ozüng benoka inyaktsüpuri parnok tinyaktsü mapa meteta inyaksangshitsüla aser April 3 nü atalokba ya kechi südir süaka memerenshi metoktsütsüla, kechiyong COVID-19 anema raraba nung yakbang nung inyaker ka parnoki nüngdak makaba nung yirutsüogo.
Iba dak alia Dr. Sezo ya kanga ajemalu aser tekümkük ketdangser ka lir, shibai Medziphema subdivision nung alirtem ajangzüktsü asoshi bendanga agüja inyaker, anungji pai police mesera temzüng ozüng anema inyaktsüji otsü mali, ta kasa sangdong nung shia lir.
Iba tatalokba ya yimya yimpong mazüoki inyaksangshiba jenjang tematiba ta shia lokti tentettemi aibelena alirtem merenshitsü khangogo ajita asünungdang iba jenjang agiba ajanga kasa wadang nung inyaker tangartema tenük lapoktsü, ta lokti tentet balala tir temi külem sangdong ka ajanga metetdaktsü.
Advisor Imnatiba-i Covit-19 anema raratsü asoshi par constituency 22 A/C Arkakong nung medical relief osettem lemtsüogo.