MTV Europe Music Awards atema Priyanka o Monica na tenüng benoker

Mumbai, September 18 (Agencies): 2015 Europe Music Awards kübok ‘Best India Act’ shilem nung sempet agütsütsü asoshi actress & kentener, Priyanka Chopra aser Monica Dogra na den külemi, India nunger kentener tenüng 3 tashi VH1 teloki benokba osang jangjaogo.

Worldwide Act shilem kübok densemba ‘Best India Act’ ya alima tesem balala nung alir kententsü sempet tajung akar shimteta parnok nem tapet sempet agütsüba mapatong ka lir.

Priyanka o Monica na den külemi, tan tenüng benoker teloktemji Indus Creed, Your Chin aser The Ska Vengers telok aliba osang jangjaogo.

Parnok sapurtemi MTV EMA indang website lapoka taruba October ita 14 nü tashi pei vote agütsütsü lenmang lapokja lir.

Mezüngbuba vote agiba sentong nung temaba jenjang angur kenteneri tanga tesemtem nungi takok angurtem den maneni toktepba sülen parnok rong nung takok angur 6 nem Worldwide Act sempet agütsütsü.

Worldwide Act sempet agizüker tenüng tarensenji taruba October ita agitsü ayongba 2015 Europe Music Awards sentong nung alima dang metetdaktsü aser iba sentongji VH1 television sentong nung sayutsü.