MU indang professor teka alenba aitsür

Imphal, Mongputeni (October) 15 (Agencies): Manipur University (MU) nung telok asemi university professor ka mozü kidangi aodang teka alener anir aoba aitsüogo.
Manipur University Students Union (MUSU), Manipur University Teachers Association (MUTA) aser Manipur University Staffs Association (MUSA) indang joint action committee-i Deobarnü sangdong ka nung ‘iba ya university züngsemtem mezüngmeshiba inyakyim ka lir’.
Police-ia professor teka alenbaji shitak ta shiogo aser iba mapa ya ozüng nung aliba ama inyak ta shisem.
“Koma’ar ka aitsü yonga, tai tonglokja alir kaji mozü kidang anir aodang handcuff asür” ta police ketdangser kati ashi.
September 21, 2018 aonung Manipur police-i Manipur University nung kaketshir 89 aser professor 6 apu. Vice Chancellor tasenba university campus telungi maitdaktsüba atema parnok dak tai tonglokja apu.
MU vice-chancellor K. Yugindro-i MUSA aser MUTA züngsemtem anema Singjamei police station nung ken o benokba sülen police-i parnok apu.