MU tesayur teka alenba atema jail ketdangser 3 mapa nungi anentsü

Imphal, Mongputeni (October) 19 (Agencies): Manipur University (MU) tesayur ka medical check-up atema anir aodang teka alenba atema Imphal nung aliba Sajiwa Central Jail nung ketdangser asem mapa nungi anentsüogo.
Manipur sorkari head warden dena ketdangser asemji Brihostibarnü mapa nungi anentsü, ta osang ajanga ashi.
Manipur Human Rights Commission (MHRC)-i jail ketdangsertem aser Manipur police anema ken o ka benokba sülen anogo ana lir sorkari iba mapa inyakogo.
P Doungel, ADGP Jail-i ashiba agi jail staff asemji mapa nungi anenja lir aser bushisüngdang südar.
ADGP-i par asem dang jail indang superintendent nungi temelaba magii headquarters toktsür maotsü atema tetuyuba agütsüogo.
September 20 ayaterm MU campus mita aodang tesayur 6 apurtem rongnung Department of Physics nungi Prof. S Dorendrajit dena liasü aser pa-a Sajiwa Central Jail nung puoka liasü.
October 11 nü pa JNIMS hospital nung temang tendangtsü atema anir ao aser iba mapang pa teka alen.
Iba inyakyim atema nisungtemi sorkar aitsü aser idangji Chief Minister N Biren Singh-i aibelenertem merenshitsü ta nangzük.
Prof. S. Dorendrajit dena tesayurtem aser kaketshir ajak taoba Mongulbarnü chiokogo.