Mufti mangdang atalok nungang sorkar akumtsü : Mehbooba

Mufti mangdang atalok nungang sorkar akumtsü : Mehbooba

Srinagar, January 31, 2016: Deobar nü Jammu & Kashmir nung Peoples Democratic Party (PDP) Tir, Mehbooba Mufti’er kidang Mehbooba (abelen) lenisüba nung PDP party core group senden amenba noksa nung angur. Noksa nungsa Party senior tatong Tir aser Member of Parliament, Muzaffar Hussain Beigh aser Jammu & Kashmir Finance Minister, Haseeb Drabu (ajichilen) nata angur. 

Srinagar, January 31 (Agencies): Deobarnü Jammu & Kashmir nung Peoples Democratic Party (PDP) Tir, Mehbooba Mufti-i lar party core group senden nung, Jammu and Kashmir nung sorkar akumtsü atema lai memelungi mali, ajisüaka la tebu Mufti mangdang ataloktsü atema inyaktsü ta teloktep party, BJP-i menangzük tashibo sorkar makumtsü, ta shiogo.
Party osang ka ajanga ashiba agi, Peoples Democratic Party (PDP) lenirtem senden nung jembidang Mehbooba Mufti-i tebu aser taoba chief minister asür, Mufti Muhammad Sayeed-i ajak nung liromedema terenlok agütsütsü aser state nung yimjung atema nükjidong yua liasü, aser itemji ataloktsü atema inyaktsü ta teloktep party Bharatiya Janata Party-i menangzükra sorkar makumtsü, ta ashi.
“Tanü core group senden menogo, iba sendenji party nütsüngsüba aser nüburtem den tongtepratepba ama party indang nüngdak jembitsü asoshi ayonga liasü. Ajisüaka lenir kar aser MLA kari sorkar akumtsü onük nung Mehbooba tebilemba metetnüa liasü,” ta party lenir kati ashi.
“Lai parnok dang, sorkar akumtsü atema lai memelungi mali, saka kecha telemtetba makaibo makumtsü ta ashi. Mufti-i BJP den lokteptsü atema telemtetba tulu ka agi saka ita 10 yimsüsüba mapang pa mangdang meinyaktetba indang lai jembia liasü,” ta kasa osang ajanga ashi.
Mehbooba-i, lai chief minister menden atema dangbo sorkar tashi magitsü ta jembiogo.
January 7 nü New Delhi nung J&K chief minster Mufti Mohammad Sayeed alima nungi pilaba sülen January 8 nungi iba state ya Angh yimsüsüba kübok lir. Iba den külemi tanü tashi Mehbooba Mufti-ia sorkar akumtsü atema mera magir.

You must be logged in to post a comment Login