Muguruza-i tetsür singles takok marok agizükogo

Spain tsür, Garbine Muguruza-i America tsür, Serena Williams madak final asaya koka 2016 French Open asayamong tetsür singles takok marok agizükba sülen takok marok amer agiba noksa ka yangi angur. (Paris, June 04)

Paris, June 04 (Agencies): Spain tsür, Garbine Muguruza-i tetsür World No. 1, Serena Williams madak final asaya koka 2016 French Open asayamong tetsür singles takok marok tanü, Honibar nü agizükogo.
Muguruza-i tanü points 7-5, 6-4 agi America tsür, Serena madak takok anguba sülen külem sensotsür, Sanchez-Vicario sülenbo la French Open tetsür singles takok marok agizüker mezüngbuba Spain tsür akümer lir.
Ano külen, tanü tashi nung Grand Slam takok marok 21 tashi agizüka alila, Serena-i tanü asaya nung tamakok anguba yong lai Germany tsür, Steffi Graf-i yangluba Grand Slam takok marok 22 agizükba otsü memeneptsüsa jenjang tamajung ajuruogo.
“Serena ama asayar mongin ka madak takok ngua takok marok agizüktsü jenjang anguba atema kanga pelar,” ta Muguruza-i tesülen metetdaktsü.
Muguruza-i 2015 Wimbledon asayamong tetsür singles final Serena densa asayatsü lemzük saka iba asaya nung Serena-i points 6-4, 6-4 ngua Muguruza tsükdaktsü.
Aji oda, tanü takok angubaji Muguruza-i yaküm tamakok ajuruba kepzüker ama lir.
Ano külen, India nunger Leander Paes aser Switzerland tsür, Martina Hingis natia mixed doubles takok marok tanü agizükba osang jangjaogo.
Paes o Hingis nati tanü ghonda 1 ser minute 28 shi nung points 4-6 6-4 10-8 ngua, India tsür, Sania Mirza aser Croatia nunger Ivan Dodig na final asaya nung tsükdaktsü.
Hingis den külemi lungjemer 2015 küm asayaba Australian Open, Wimbledon aser US Open mixed doubles takok marok agizüksang, arishi küm 42 tain Paes-i tan agi mixed doubles takok marok 10 buba aser Grand Slam takok marok 18 buba agizüker lir.
Arishi küm 35 tain Hingis-ia tan agi Grand Slam takok marok 22 buba aser mixed doubles takok marok 5 buba agizükba osang jangjaogo.
Anosa, Serbia nunger Novak Djokovic aser Britain nunger Andy Murray nati pei semifinal asaya koka tebur singles final asüng, Deobar nü asayatsü jenjang yashi, Hokolbar nü nguogo.
Tebur World No. 1, Djokovic-i points 6-2, 6-1, 6-4 ngua, Austria nunger Dominic Thiem semifinal asaya nung tsükdaktsü.
Murray-ia yashi points 6-4, 6-2, 4-6, 6-4 agi defending champion, Switzerland nunger Stan Wawrinka tsükdakja final asayatsü jenjang angu.