Muguruza, Nadal last 16 tongtetogo

Paris, Aami (June) 2 (Agencies): Küptoknü French open tetsür kija asaya ka nung Garbine Muguruza-i 6-0, 6-2 agi Australia tsür Sam Stosur kokogo.
Muguruza shibai 2016 küm iba asayamung koka lir lai Stosur den asayaba mapang nung winners 15 nguteta liasü. Mezüngbuba set minute 25 nung dang tembangba sülen Stosur-i tanabuba set game tasembuba nungang takok ngua liasü.
“Taoba US Open koker alila den asayatsü ya kanga melarabo masütsü, ta ni meteta liasü. Ni kü tajungtiba agi masayara la akoktsü kanga tasak asütsü, ta angatet,” ta arishi küm 24 tain Muguruza-i ashi.
La taruba asaya Ukraine tsür Lesia Tsurenko den asayatsü shibai Magdalena Rybarikova 6-2, 6-4 agi kokogo.
Kasa asayamung tetsür kija asaya tanga ka nung Anett Kontaveit-i 7-6 (6), 7-6 (4) agi Czech tsür Petra Kvitova kokogo.
Iba asayamung anogo tenetnübuba asaya nung Grand Slam koker alir parnok tenet rongnung Kvitova-a ka liasü aser tang iba tamakok ajanga lai asaya 13 tashi khen danga tamakok mongui arua aliba raksaogo.
Maneni asaya tanga ka nung M. Sharapova-i 6-2, 6-1 agi K.Pilskova madak takok ngua last 16 tongtetogo. La taruba asaya nung Serena Williams den asayatsü akok.
Kasa asayamung tebur kija asaya nung Defending champion aser world No. 1 Nadal-i 6-3, 6-2, 6-2 agi lanuwa medemer Gasquet kokogo.
Tena tsüngda tang tashi nung 15 ben asayaa lir, aser asaya ajak Nadal-i koka lir.