Muhammad Ali-i Sharon Stone movie star ka asütsü ta takzüteter liasü

Los Angeles, June 10 (Agencies): Hollywood actress, Sharon Stone-i, la arishi küm 17 asüdangyongi nüngtugu boxer, Muhammad Ali-i la movie star ka asütsü ta takzüteter liasü, ta ashi.

Golden Globe takok angula, Sharon-i tawa lai Ali ajuruba indang jembia liasü, aser iba mapang nung pai yangluba film ka nung lai shilem ka agitsü asüngdanga liasü, ta ashiba osang ET online osang ajanga metetdaktsü.

“Ni arishi küm 17 asüdang ni pa (Ali) ajuru. Ni Miss Pennsylvania pageant nung liasü aser pa Hershey, Pennsylvania nung liasü, ni yangji liasü aser ni pa ajuru. Iba sülen pai kübu aja aser pai yangluba film ka nung kü nem shilem ka agidaktsütsü asüngdang,” ta Stone-i ashi.

“Kübui ‘lai film nung shilem magitsü ta ashi’. Pai kübu dang ‘Naibo lai shilem magitsü ta bilemtsü, saka lai agitsü. Nai iba tetsürlaji miimbanga meyutettsü. La kanga tesangra’ ta ashi,” ta Stone-i ashi.

2012 küm Sharon-i Ali indang charity sentong, Muhammad Ali’s Celebrity Fight Night XIII nung dena liasü.

Laisa ashiba agi, “Ni pa dang, ‘Ni aiür chanu asüdang ni na ajuruogo, aser naibo ibaji mebilemtettsüsa akok,” ta ashi. Pai kü dang ‘Au, na anüng sentsü süoshi ka semer liasü ta ashi.”