Mukherjee nem Cote D’Ivoirie linüki temaba award agütsü

Abidjan, June 15, 2016 : Bodhbarnü Abidjan nung aliba Presidential Palace nung Cote D’Ivoire Tir, Alassane Ouattara-i India Tir, Pranab Mukherjee nem par linük indang temaba award, Grand Cross National Order agütsüba noksa nung angur.

 Abidjan/New Delhi, June 15 (Agencies): Tanü Cote D’Ivoirie Tir, Alassane Ouattara-i India Tir, Pranab Mukherjee nem par linük indang temaba award agütsüogo.

Abidjan nung aliba airport nung Mukherjee agizükba sülen Ouattara-i ayongzükba sentong nung pa nem Republic of Cote D’Ivoirie linük indang Grand Cross National Order agütsü.

Iba sentong nung jembidang Tir, Mukherjee-i pai iba akhümket sempet ya India nunger billion ka dak tema nüburtem tenüng nung agizüker, ta ashi.

Mukherjee-i, “Kü nem National Order of the Republic of Cote D’Ivoirie agütsüba atema ni kanga pelar. Iba ya asen linük ana nüburtem akhidang nungi tangatettep nung tembar ama aliba temaitsü ka ama ni iba ya züngshir,” ta ashi.

UN reforms dak sentakba nung Mukherjee-i, “linük ana temesüktep onük aika lir kechiyong linük anaprong regional aser international naprong nung shilem agirtem lir aser onük balala nung amalitepa inyaker,” ta ashi.

“UN inyakyim aser tanga international tentettem tashi itdaktsütsüji asen teinyaktsü lir ta asen linük anapronglai bilemer. Asenoki itemji melenshidaktsüner, kechiyong itemji tapet aser item jagi tanü alimai ajurua aliba tayongzükbatem koktettsü. Iba dak sentakba nung United Nations tentettem, talisa UN Security Council nung khuret abentsü India renema lir,” ta Tirisa metetdaktsü.

Tir Pranab-i, India nunger public aser private sector nati Cote D’Ivoirie den senteper agro-based industries amenoktsü melunga lir, kechiyong ner linük nung ali tajung den ali nungi adokba rongsentem lir, ta ashi.

“Nenok rongsenkettsüng aintsü atema ner sorkar den senteper nüngdakba sector balala nung terenlok agütsütsü melungsoa lir. Onoki agütsütettsüsa jenti lir. Tang asen linük anaprong ainba shilemji 7-9 lir, maongka aika lir aser itemji agitsüla,” ta Mukherjee-i metetdaktsü.

Abidjan nung aliba Information technology park ka Mahatma Gandhi nüngtem nung jaloktsüba atema pelaba lemsatepdang Mukherjee-i, “Pa ya atangji India aser Africa naprong jabaso ka lir,” ta ashi.

Tir-i, Cote D’Ivoirie rongsenkettsüng ainba nung onoki maneni yaritsü ta metetdaktsüba den külemi paisa, taruba küm ishika tsüngda linük ana tsüngda shishilembabaji US sen billion 1 ajungtsü imlar, ta shisem.