Mulatonu-i kuli maliba onük jembir : NSCN

Dimapur, November 1 (TYO) : Mulatonu, GPRN/NSCN-i March 2017 tashi nung India sorkar den yimten olemtep tenzüktsü ta ashiba nung kuli kecha mali, ta NSCN-i sangdong ka nung metetdaktsü.
India sorkar den yimten ken o angatetteptsü ta aiben jembia arur saka kuli kecha mali. 2007 nungi parnoki ceasefire atsülangtepa dang arur aser parnoki India nunger ozüng kübok ceasefire tenangzükba agitepba sülen tashi anga anidaker, ta MIP sangdong ka nung metetdaktsü.
GPRN/NSCN-i sarutem sarutsü atema mapang shia otsütem purateta jembia arur aser ibaji Naga nungeri meteta lir saka saru sarubaji parnok züngsemtem asoshi dang lir. India sorkar nungi ketdangsertemi Kehoi Campers dang Indo-Naga yimten ken o atema telemtetba ka dang agitsü ta aiben nenshia metetdaktsüogo. India sorkar aser Naga nunger tenüng nung NSCN tsüngda tang yimten ken o tejembidak nung ajak dena lir aser iba ya tatembangba lir, ta MIP sangdong nungsa shia lir.
GPRN/NSCN nungi züngsem kari ochiba angateter NSCN nung adener aser tesüiba ita ishika tsüngda parnok noklang aika onok den züngsemogo. Anungji, par züngsemtem tesep toktsür moudaktsütsü atema aser Naga nunger külakoktsütsü atema Mulatonu-i March 2017 nung yimten olemtep tenzüktsü ta jembir. Ajisüaka, March 2017 matongdang, Indo-Naga yimten ken o angatetteper alitsü.
Iba mapangji GPRN/NSCN mezüngoktsü aser India-i iba ama telok ka den yimten olemtep kodanga malitsü. Anungji, Naga nungertemi asayamenür kari yimten ken o atema jembiba nung tamang makatsü metetdaktsür. Naga nunger ajak tenüng nung NSCN-i yimten ken o jembir aser onoki iba indang chichiba jenjang meteta lir. Anungji, ajaki agizüktettsüsa tatembang telemtetba ka magi tashi nübortemi aremzüka atatsü mepishir, ta MIP sangdong nungsa metetdaktsü.