Mulayam PM südaktsüra Cong den lokteptsü: Akhilesh

New Delhi, December 04 (Agencies): Hokolbar nü Uttar Pradesh Chief Minister, Akhilesh Yadav-i, Samajwadi Party tongti, Mulayam Singh Yadav Ato kilonser aser Rahul Gandhi Deputy Ato kilonser asütsü melungtepra Congress den lokteptsü lenmang lir, ta ashi.

Tanü New Delhi nung 13 buba Hindustan Times Leadership Summit tenzükogo, aser iba sentong nung Akhilesh-i item o jembia liasü. Iba senden nung Congress Party tatong Tir, Rahul Gandhi-a liasü, ajisüaka Rahul-ibo osangbenertemi asüngdangba kecha melangzü.

Yimtenren nung Rahul Gandhi den tesentaktep yanglua Congress den lokteptsü lenmang lir asü (?) ta asüngdangba langzüdang UP CM-i, “Ni Samajwadi (socialist) ka asüba yong nenoki kü dang asüngdanger aser nenokisa, kübui (Mulayam) ni merenshir ta jembir. Ni kü tesayur/lenir mangdang ataloktsüner aser pa atema inyakner. Pa (tebu Mulayam) Ato kilonser aser (Rahul dak temeyong tuyua) pa Deputy Ato kilonser asütsüla. Iba tezüngzüktep nung ni melunger aser tang-a teloktep yanglutettsü,” ta ashi.

Osangbenertemisa, Bihar nung tsükchir ana- RJD aser JD-U loktepba ama 2017 küm UP Assembly election nung BSP den lokteptsü lenmang lir asü (?) ta asüngdangbabo pai junga melangzü.

Tamalen Akhilesh-i, “Tang mapang nung lokteptsü atema mejembir. Tangbo mejembiba tajungba asütsü,” ta jembia liasü.

India nung nütsüng timtiba state, UP chief minister-i, “BJP mesüra parnok den adenba party tem den atongsemtsüji tamakoktsü, kechiyong parnoki telemsa adokdaktsür aser o mashie jembir,” ta ashi.

Dadri nung lokti kati Muslim nunger ka tepsetba tatalokba menokdangtetba atema tasüngdangba ka langzüdang pai, sorkar ketdangsertemi tensa azüoktetba ajanga telok kari tensa raksatsütsü merangba nokdangtet, ta ashi.

Arishi küm 42 Akhilesh-i, Ato kilonser Modi aser BJP-i linük ya ‘tajung anogotem’ dangi anitsüla, ta ashi. “Tajung anogotem sayur nisungtem ‘love jihad’ dangi ogo. Koba chiyungtsü achitsüla mesüra kechi sobutsüla mesüra kechi jembitsüla, ibaji shiba lemtettsü (?) Nai (Modi) Google (tongti) ajurutsü aser Facebook (CEO) den ‘selfie’ agitsü. Shibai kechi achir, kechi sobur mesüra kechi jembir, ibaji asenoki amatoktsüla,” ta pai ashi.

March, 2012 nung Akhilesh ya Uttar Pradesh nung Chief Minister tanubosang ka ama tenangzükba agia liasü aser pai, party len anitsü atema temetenji SP tongti dak lir, ta ashi.

13 buba Hindustan Times Leadership Summit nung linük aser bendanglen nungi lenirtemi, India ya alima nung jenjang tajung kati atutsü akok asü (?) ta o lemteptsü. Iba summit nung o jembitsü jaokertem rongnung Ato kilonser Narendra Modi, Union Finance Minister Arun Jaitley, Delhi CM Arvind Kejriwal, actress Kareena Kapoor Khan, Kangana Ranaut, Nicole Kidman aser taoba mapang Australia nunger cricket asayar, Ian Chappell nunger densema lir.