Mulki-i Jordan Ato Kilonser inyaktsü tenangzükba agiogo

Amman, September 28 (Agencies): Jordan yimsüsür, Hani Mulki-i Jordan Ato Kilonser tanabenren inyaktsü tenangzükba tanü, Bodbar nü agiogo.

Taoba mapang tongti sorkar lenisütsü aser minister menden abensang, arishi küm 64 tain Mulki ya taküm, 2016 küm May ita Ato Kilonser mezüngsüa shima liasü.

Iba sülen, taoba hopta agiba parliamentary election nung takok ngua, Mulki-i Ato Kilonser menden tanabenren abentsü temeten taoba Deobar nü ajangzük.

Jordan yimtiba, Amman nung sentong agia, Jordan chuba, King Abdullah II-i Mulki nem tenangzükba agütsü aser Mulki-i tan tenangzükba agiba sülen par Jordan linüki ajurushia aliba rongsenren aser shishilembatsüren jenjang mejungi aliba khuret benoker lir.

Sorkar tasen tentettsütsü, tongti onüktem temzüng ozüng küma agizüktsü aser parliament loksatsütsü densema, Jordan nung latetba linük temzüngi par chuba nem tashi tulu agüja lir.

Ajisüaka, finance, foreign aser finance minister-tembo taoba mapang shimba yimsüsürtemi maneni abentsü renema lir.

Mulki-i aniba Jordan sorkar tasenbai par mezüngbuba senden taruba October ita amentsü renemogo.

Ano külen, tan agiba election nung Jordan nung tentetba Muslim Brotherhood (MB) yimtenren telokia jenjang tajung anguba osang angazükogo.

MB teloki taoba küm 10 shi Jordan’er yimtenren sabang nung shilem magi aruba sülen tan tashi itshir election nung shilem agiba osanga jangjaogo.