Mulung lemtetba purtem asütsüla

Alima nung nisung dak aliba tashi angudak aser agütsüdak tulutibaji kati ka dak temulung lemtetba ya asütsü südi. Aji oda, Tsüngremia asen dak temulung lemtet nung dang moatsütsü aser nisungia asen dak temulung lemtet nung dang mapaa aser teyaria agütsütsü aser asen nüngdakba mapang tapua aputsütsü. Anungji, tangari temulung lemtettsüsa alir takümsa takarba aser teloksa tashi taitba asütsü. Iba amaji, yimten, arogo aser lokti lenitsüba mapa nunga teloki temulung lemtetba nisung alitsübaji kanga nüngdaker. Tatishitsü agi, arogo nung mesüra lokti tentet ka nung sen mapangser asütsü asoshi nisung shimtsü nüngdaker, saka züngsem ka dak danga temulung alemtsüsa mali, paibo mesüra laibo lokti aser arogo meyong tesarutetba ajunga miima agiadoktsüba nisung süra, iba telok aser arogoji komaka taküm lia aotsü ? Kasaji, yimten nunga ozüng raksaba mapatem anema inyaktsü asoshi tasü tait aser teindang nisung kar nüngdaker saka yimten mapa nungji ochishia inyaktsüla nisung kata melira, iba limaji ozüng raksaba mapa nungi koba tashika kümzüka litettsü ? Aji oda, akhidang nungi koba lima aser yimten südir süaka, tsükchirtem ket nungi pei lima aser nübortem kümzüka ayutsü asoshi mitsa nung mitkartem nem mitdaktsür. Iba jagi tsükchirtemi mitsa nempoka marutet nokdangadoker. Iba kasaji tanüa alima aser yimten shia pei süngkümji mitsa lir, anungji yangji mitkartemi amang sangwa methitemi anüker. Atangji, akhi putu tsükchir o tanü putu tsükchir na balala asütsüa akok, kechiyong akhidangbo tsükchirtemji bendanger yimmakertem dang liasü saka tanübo yimmakertemji tekolak bushir aser tangar yimli atsüngdoker yimsüsütsü atema yimten tashi bushirtem dang masü saka ozüngi memelaba osettsüset aser machimajemtsütem shibelena ayokertem lir. Itemji yimten aser nübortem asoshi kanga lendong aketba tsükchirtem lir. Item jagi yimten meyong rongsenren jenjang tashi mait aludaktsütsü aser tarutsü putu nung pei lima anüker malitsüsa lanurtem taküm raksatsütsü. Iba tangatetba nung, tang aser tarutsü nung  pei lima aser nübortem kümzüka ayutsü atema government-i maparen shia mitkar tapu balala shimer pei lima aser yimti süngküm nükdaktsür. Item mitkartem alibaji ajanga dang ozüngi memelaba prangpong injang, hon taribi, yi aser mozümora shibelenertem nokdanger aser parnok mapaji sadema meinyaktettsüsa kümdaktsür. Aji oda, tanü asüng balaka Nagaland artsü ajaklen mitkartemi anükba mitsa (check post) nung itemla ozüngi memelaba oser aser machimajemtsütem apuba osang angashir. Iba jagi asenoki memeteti kija kibong taküm aika kümzükdagi ta asenoki bilemdi. Aji oda, item mitkartem jagi mitsa nung anogo shia ozüngi memelaba yi aser mozümora apuba dang masü saka tangbo hon sen crore 22 jenjang apuba osang metetdaktsüba to agi, mitkartemi asen lima aser nübortem ozüng raksartem ket nungi kümzüktsü asoshi nübortemi parnok dak temulung lemtettsüsa inyakba tasü tait aser teindang shisatsü tuluka sayuogo aser ano külen asen lima nunga ozüng raksartemi shibelen mapa tapu balala inyakba tensa tia indang metetogo. Ajisüaka, ano kasa tatalokba maparen nung hon apur mitkar par ter asemi hon shibelener ket nungi apuba hon-temji shitak mayuba ajanga mapa nungi agiena atatsüsa akümba osang jagibo parnok dakji temulung melemtettsüsa tezüdangtsüka atalokogo. Aji oda, mitkartemi ozüng anema shibelenertem ket nungi apuba yi aser mozümora yimten ket nung ayutsü melen pei ajangzüktsü asoshi miima kar agiteta yura, itemjibo ozüng anema shibelenertem dang nungi tamajungba pei lima aser nübortem ashioktsürtem asütsü. Kasaji, aiben mitkartemi ozüng alema shi belener ket nungi temulung melemtettsüsa sen aika bener jajaba putettsüa akok, mesüra tang amaji hon taribi sen crore noklang jenjang aputsüa akok. Iba ama tensa mapang, ashiko, nisung asünungji pei shisatsü nung itemji aginüa bilemtsüa akok. Ibaji pei lima tsükchirtem ket nungi kümzüktsü asoshi yimteni temulung lemteta shimtetba mitkar ka asoshi tatidang tuluka asütsü. Yi pongdang ter metsüka agiteta yur mesüra sen tera meshia yur odang ozüng raksaba mapaji inyakdaktsütsü asü ? Mozümora talep kar miima yur tezülen nungi asen atema senotsü kar ajangzüktsü merangtsü asü ? Hon biscuit ka ana miima yur, iba jagi asenbo takar akümtsü saka alimabo ozüng raksaba mapatem agi süngdaktsütsü ta inyaktsü asü ? Alima rongsenji masü saka tanü asen lima asen chirnurtem asoshi yanglushitsütsü atema nüngdak tongtibangtibaji temulunglemtetba nisung lir. Iba nisungji asenok asütsü merangdi.