Mulungsü

– Süpongnüngsang Longkümer,
Darogapathar Dimapur.

Mulungsü tetezü kechisarena nung tajung tetangshe ajaki tajunga ta shitetba mapa aser yimya. Ao limai Tsüngrem osang marudang zülu maka mulung züng agi lipok otsü süshia, kechisa nüngdaker, inyaker, aser ataloker item ajak nung jempishinü, lemteplemra ajak ken ka o ka jempia, tena aruba lipaliru agi temeden ngua liyonga aru. Kechiaser otsü ka jempi nung ken ka metenra otsü keja jagi medentsü makoke liasü. Saka kodang Dr E W Clark asen lima adong parnoki Khrista osang tajung tang masü zülutsü, tentettsü, tapensa pener arua asenok nem metetdaktsüba ya Molungkimong nunger oji jungle o asü nung Tzüma lima nung Süpongmeren nunger ajanga Clark nunger Ao o terapo angazüker kelen ang apusua ta otsü ajanga angazüka aruogo.
Mongsen o ya tsürapori ken o a ta jempia aruba ama asenok ken oji tongmelang ama saka rajema angatetba o lir. Temetettsü kaji khen agi tamanger maliba mapang asü yong limapur kensü ta ajar ashe ibai Aoer kensü, ken tenyur ka aser tanurok ka aser tanüngba ajak tazüngsümer lia atenba ya a tanganütsüka, tamasa yongi asen kensü nung aser mongsen o agi mejem asüpo tanganütsüka tena lila ta pilemer. Saka iba ken o ya kanga tarok asü nung mongseneria ajakbo ratettsü tasak südi.
Mezüngpuri jungle o agi tenzük nung joko memelenshitettsüsa kümogo, saka asen o tapu ana jagi takar ta metetdaktsür. Anungji mongseneri jungle o metet ama jungleria ajaki mongsen o metettsü nüngdaker.Jungle o agi asenok dak nungi razüka aor ajak nem Laishiba, aser ken agi yaria arur,anungji Laishiba aser ken kaket melenshipet melenshi nung tangar kin i kechi pilemtsü.
Tanüpo parnok tajungba aser tapensaba alitsü südi. Saka asenok o tanü asüng tasen yanglur ama Paper nung adokjen adokba agi kechi tanüla sayur. Shir ketdangsür ali parnok ten metongshitep nungpo jungdisü ta pilemer. NIV laishiba ya a English saka Greek,Laden, aser Ibri Laishiba nung aliba ama masüa ta nenok tashi temetetertemi metongshia sayur.
Anungji ken nunga note aipelena lira ajibo melenshitsü nüngdaker, aji mesüra o tera mapensae alinungpo yimya tang ta pilemdi. Laishibjia tarokdiba aser tapensaba nung shiri rateter item jagi meyip nung tajung,saka kowepen meyipshitsü asen kija alir masüago. Ken meteter yimya, kati ken kanga junga atenür saka note memetet, kati notebo kanga junga metet saka kenten majung, ken kanga junga atenür saka ken yanglu mashi, Note junga metet saka Tangar o nungi meyipzüktsü memetet. Ken kaket yanglutang note rajema metet, ken o meteter aser lenla tapensa asaa tang nüpu pushir inyak nungpo jungkümsa ta pilemer.
India nunger küm aika sports nung tamakok ngua arupa ya sports officer aser kedangsür koba state nungi shimdir parnoki India ajunga nungi asayar tajung pushia shimer shilem agidaktsü nungpo takok angutsü, saka bei state nungi mesüra bei nisung tang shima asayadaktsüba agi tamakok ngua aruba tang küm ishika takok terara penür aruba angashir.Kanga temerük ama sayuaka nisungia reprangteter aser meteter nung Tsüngrem tsüngdangbo sadaka lir. Anungji Tsüngrem tsüpuseta mapa tajung inyakba agi nüpira pelatsü aser asen dak Tsüngrem tepur ajung reprangtetba agi Tsüngrem sentsü wangshitsü.
Tazünger ajak moajang.