New Delhi, April 20 (Agencies): India linük nung tang mezüng bullet train, koba Mumbai aser Ahmedabad na tsüngda senzütsü, iba train nung amenertem train nung jajadang tzü ajangaa senzütsü.
Kilometer 500 shi jajatsü aliba train lenmang nung tzüyim ajanga kilometer 21 jajatsü sentong lir, ta Railway Ministry ketdangser kati Press Trust of India dang ashi.
Tzüyim adena senzütsü aliba tesemji Thane ayong anasa aser Virar-i aolen asütsü, ta kasa osang ajanga angazüker.
Iba bullet train jagi ghonda nung kilometer 320 shi jajaa ghonda ana shi nung Mumbai nungi Ahmedabad yimti atongtsü.
Tang express train kati iba yimti ka nungi ka atongtsü atema ghonda 7 shi agir.
Yaküm December ita nung Japan Ato kilonser, Shinzo Abe-i India semdangba mapang pai iba train atema US sen billion 12 aputsütsü nangzükogo. Sen tetemlok rate ji 0.1 dang asütsü aser küm 50 nung sentsü omatsü.
Japan den sen apuba tezüngzüktepji taküm küm tatemlen agitsüa akok aser 2018 nungi maparen tenzüktsü, ta PTI osang ajanga ashi.
Mumbai-Ahmedabad Bullet Train tzüyim nunga senzütsü added by asungba on
View all posts by asungba →
You must be logged in to post a comment Login