Mumbai-Ahmedabad ‘high speed’ train lenmang yangludang Japan-i yaritsü

New Delhi, December 12 (Agencies): Mumbai-Ahmedabad sector nung ‘high speed’ train lenmang yangluba nung yariteptsü asoshi India aser Japan na tezüngzüktep ka yuogo. Iba project nung Japan-i India nem sen billion dollar 12 sentem kanga ajemer aputsütsü lemtetogo.
“Japan Railways Group company pezü senteper ‘high-speed’ train lenmang yanglur, ‘Shinkansen’ teloki yaria India nung tan mezüngsüa Mumbai-Ahmedabad nung iba lenmang lapoktsü sentong lir,” ta Japan Ato Kilonser Shinzo Abe dena osangbenertem den senden amendang Narendra Modi-i ashi.
“Iba project atema Japan-i technical teyari den sen billion dollar 12 tashi sentem kanga ajemer apuja yaritsü mulungtetba asoshi Japan Ato Kilonser Abe dang kanga pelar,” ta Modi-i ashi.
Iba mapa ajanga tarutsü atema India nung temelenshi balaka bener arutsü aser rongsen kettsüng tsütsü temelenshi bena aruba kol ka ama asütsü, ta pai ashi.
Osangbenertem den jembidang, Foreign Secretary S. Jaishankar-i, Japan nunger ‘high-speed rail technology’ (Shinkansen) teyari ajanga Mumbai-Ahmedabad high speed train lenmang yanglutsü, ta ashi.
“Japan-i tang India nem aputsütsü nangzükba sen ya küm 50 nung aomatsü züngzüktepogo aser küm 15 tashi sentem 0.1% dang agitsü,” ta Jaishankar-i ashi.
Paisa, “Make in India” sentong küboka technology benoktsü, ta ashi.
“Tang ya tezüngzüktep tulu ka agiogo. Iba project acha ayangtsü soshi nisung tain agi akümba tentet ka tentetsü lemtetogo,” ta foreign secretary-i ashi.
Jaishankar-i iba project renemtsü asoshi küm 7 shi agitsü akok, ta metetdaktsü.
Iba project atema nüngdakba sen ajak India aser Japan na teloktep sen amshitsü, ta ashidang pai, tang shimtetba tentet ajanga nüngdakba ajak acha awa-a aotsü, ta shisem.