Washington/New Delhi, May 27 (Agencies): United States (US)-i Pakistan linük dang 2008 küm Mumbai amakba 26/11 ken o bushisüngdangba nung India den yariteptsüla ta shiogo.
US-isa Pakistan dang parnok litsü nungi kiralongraba maparen nokdangtsü atema kiralongrar teloktem mittsüla, ta ashi.
“Brihostibarnü osangbenertem senden ka nung state department deputy otongdar, Mark Toner-i, “Onoki maneni Pakistan sorkar dang item amakba ken o bushisüngdangba maparen nung India ketdangsertem den yariteptsü ajungshir,” ta metetdaktsü.
“Iba (kiralongrartemi Mumbai amakba) ya lendong tulu ka lir. Onoki ochi obendang aginer aser Pakistan dang amalitepa yariteptsü atema maneni ajungshir,” ta pai ashi.
Pai ashiba agi, US-i Pakistan ketdangsertem dang parnoki litsü nungi kiraloraba mapa inyaker Taliban telok densema kiralongrar telok ajak mittsüla ta ashir.
“Ibaji inyaktsü atema taoba mapangtem nunga onoki parnok ajungshiogo. Onoki ibaji inyaktsü maneni ajungshir aser parnoki litsü nungi amokmerenba atema parnok den külemi inyaker,” ta Toner-isa shisem.
You must be logged in to post a comment Login