Mumbai, Bhendi Bazaar nung ki chirepba lendong nung 21 asü

Mumbai, August 31, 2017: Brihostibarnü Mumbai yimti kübok Bhendi Bazaar kiyong nung ponguben amentepa yangluba ki ka chirepba sülen Fire brigade aser NDRF sepaitemi ki chirepba jana nungi nisung bushiba noksa nung angur. 

Mumbai, August 31 (Agencies): Brihostibarnü Mumbai kübok Bhendi Bazaar nung ponguben amentepa yangluba ki ka chirepba lendong nung nisung 21 asü, nisung 15 yiru, aser nisung 25 shi kümzükogo.
JJ Hospital anasa Pakmodia street nung aliba kiji tanep 8:30 ako meta chirepa liasü.
Fire brigade osang ajanga ashiba agi, “Iba kidangji kibong 9 telidak liasü. Nisung 30 shibo anenbanga lir südi ta bilemer,” ta metetdaktsü.
Iba lendong atalokba sülen 8:40 ako meta Municipal Corporation of Greater Mumbai (MCGM), disaster management cell nem iba osang metetdakja liasü, ta MCGM ketdangser kati ashi.
“Iba sülen onoki fire brigade sepaitem iba tesem jagi yok,” ta paisa shisem.
Police ketdangser kati ashiba agi, kanga tain ana densema nisung 21 asü aser nisung 15 shi yiru; yirua alirtemji J J Hospital-i anir ao, ta metetdaktsü.
Tang National Disaster Response Force (NDRF) nungi sepai 45-i fire brigade sepaitem den yaritepa kümzükba maparen inyakdar.