Mumbai bomb lendong ken o nung aija alisang Dossa Mustafa süogo

Mumbai, June 28 (Agencies): 1993 küm Mumbai nung bomb aika amshia lendong agütsüba ken o nung aija alisang, Mustafa Dossa Bodhbar nikongdang 2:30 ako meta Mumbai nung temelungjang tashidak agi süogo.
Bodhbar anepdang züngia pa teku nung tashitsü atuba sülen pa Mumbai nung aliba JJ Hospital-i anir oa liasü. Dossa ya Mumbai bomb lendong sentong yanglur tongti rongnung ka liasü aser telungpur tetsüti, Dawood Ibrahim den külemi inyaksemer ka liasü.
Hospital dean, T P Lahane-i, “Tanep 3:00 ako nung hospital nung aliba Jail ward nung Dossa anioka liasü. Pa teku ashiba den high blood pressure, diabetes aser infection liasü,” ta metetdaktsü.
Yashi CBI-i, bomb lendong agütsüba nung Dossa-i agiba shilemji tamalen alenseta südaktsüsang, Yakub Memon dang nungia tamajungba lir, anungji pa nem tasüba temerenshi agütsütsüla, ta benoka liasü. CBI-isa, Mumbai amakba asalentong yanglur tongti rongnung Dossa densema lir, ta ashi.
June 16, 2016 nü iba ken o tanabenbubaren angadangba mapang Dossa densema tai tonglokja alir parnok pongu aija liasü. Ano tai tonglokja alir, Riyaz Siddiqui bo TADA Act kübok dang aitsü.
1993 küm March 12 nü Mumbai nung bomb aika pokdakja amakba lendong nung nisung 257 asü aser nisung 700 dak tema yirua liasü. Iba tatalokba sülen küm 24 lir special TADA court kati Abu Salem aser Mustafa Dossa densema nisung pongu aitsü aser kuli peria mengui ka chiok.
Iba ken o nung aitsürtem rongnung: Abu Salem (2005 küm Portugal linük nungi anir aru), Mustafa Dossa (UAE nungi anir aru), Mohammed Tahir Merchant (Tahir Takla), Karimullah Khan, Riyaz Siddiqui aser Feroze Abdul Rashid Khan nunger lir.