Mumbai bomb lendong nung yirur ka küm 9 sülen süogo

July 07, 2015: Mumbai 7/11 bomb lendong nung yirur, Parag Sawant (36) tesüiba küm 9 tashi tasü-a masü, taküm-a masü ta lir sülen tanü Mumbai nung aliba hospital ka nung süogo. 2006 küm July 11 nü Mira Road anasa bomb apokba mapang nungji pa Churchgate-Virar train nung liasü.

Mumbai, July 07 (Agencies): Mumbai 7/11 bomb lendong nung yirur, Parag Sawant tesüiba küm 9 tashi tasü-a masü taküm-a masü ta lir sülen tanü Mumbai nung aliba hospital ka nung süogo.
Arishi küm 36 Sawant iba lendong nung tekolak kanga mejungi yiruba sülen July 12, 2006 nü P D Hinduja Hospital-i anir oa liasü. Pai kinüngtsü Priti aser jala na toktsür süogo. Jala asoba mapang nungbo pa saakteta liasü.
“Pa ‘coma’ nung küm ana shi liasü aser pa temang tajungba aküm, iba mapang nung pai tila-teribo angateta liasü,” ta P D Hinduja Hospital, neurosurgeon consultant, Dr B K Misra-i tanü sangdong ka ajanga ashi.
“Pa tekolok asoshi operation aika agiogo aser küm ishika pa nem physioteraphy aser supportive care agüja liasü. Anepdang 5:30 ako nung staff nurse-i Parag semdangba mapang pa junga liasü. Tesülen 6:00 ako nungbo saturation level ajema aküm aser pa tangu junga sashitettsü asoshi pa nem oxygen agüja liasü,” ta pai ashi.
Sawant ajungbena tangu mesashiteti akümba yong CPR team-i pa shia arudaktsütsü asoshi mera ajak agia liasü,” ta paisa ashi.
“Item mera ajakji agiaka Parag shia marutet aser tanep 6:54 ako nung pa süogo. Pa cardio respiratory arrest ajanga asü,” ta Misra-i ashi.
2006 küm July 11 nü Mira Road anasa bomb apokba mapang pa Churchgate-Virar train nung liasü. Iba sülen pa mezüng Mira Road nung aliba Bhaktivedanta Hospital-i anir ao aser tesülen Hinduja Hospital-i anir ao.
7/11 Mumbai nung bomb aika amshia train amakba lendong nung nisung 188 asü aser nisung 817 yirua liasü.