Mumbai City FC asst. coach Bruzon mapa nungi anenogo

Mumbai, November 08 (Agencies): Mumbai City FC aser par telok nung assistant coach, Spain nunger Oscar Bruzon na tangatettep nung pilaogo, ta Indian Super League (ISL) franchise ajanga Deobarnü metetdaktsü.
“Onok tsüngta football tsütsü tebilemba balala liasü aser ibaji ajanga tangatettep nung pila tajungba ta shisadanger onok pilaogo. Oscar-i onok yariba aser nungitba asoshi pa dang kanga pelar aser tarutsü nung pai inyakba ajak nung temoatsü lidangjang ta onok tamang aser teimla,” ta franchise nung CEO, Indranil Das Blah-i sangdong ka ajanga ashi.
Bruzon-i, Mumbai City FC den tesendaktep teti monungra bilemtettsü, ta ashi.
“Akhüm tsübuba tetettsü kü club, asayartem, club kiburtem aser club sapurtem tushia benshibaji lir. Ni mapang tatsüka tsüngta nung club atema inyaktetbatem ajanga kü sasa ulua bilemer. Ni amanger parnokia kasa bilemdar,” ta Bruzon-i sangdong ka ajanga ashi.
Kasa sangdong nungsa pai, “Mumbai City FC telok ya ni asoshi kibong tajung ka mesüka liasü aser parnok den külemi inyakshiba ya ni asoshi kanga konang aser ulua bilemtsü lir,” ta shisem.
French nunger Nicolas Anelka ya Mumbai City FC nungi asayaba dang masü saka telok nung coach ka ama lir. Tang tashi nung Mumbai City FC match 8 asayaba nungi point 11 nguteta par group nung jenjang pezü buba nung lir.