Mumbai ‘Juhu Beach’ nung whale tasü ka angu

January 29, 2016 : Mumbai Juhu beach nung whale feet 40 tera agi majung ka sür lia angu. Cranes amshia iba whale tasüji tzüküm nungi benerogo.  

Mumbai, January 29 (Agencies): Hokolbarnü Mumbai Juhu beach nung whale feet 40 shi ka sür tzüküm nung pungteter lia angu. Iba whale ya tonne 20 (Kg. 20000) shi liasü aser iba whale tasü ya Brihostibar aonung pungteta adok asütsü südi ta bilemer.
Whale tasüji lifeguards aser anepdang asemzüa senzürtemi tama angu aser parnoki police nem osang agütsü.
Forest department nung ketdangser kati ashiba agi, “Bryde’s Whale” ya sür anogo ananü mesüra asem shibo asütsü.
“Iba whale dak yiruba zübu kecha mali saka sensa-a reprangdanger iba teret rangben wazüka ayutsü merangtsü,” ta Mumbai Forest Department nung conservator Makarand B Ghodke-i ashi.
Maharashtra tzükümtem nung whale tasü anguba tulu rongnung ibai tanabuba lir. Yaküm küm Alibaugh tzüküm nung blue whale ka adoka ghondha 10 tashi tzü-i aitsü meranga ateptener süadok.
“Bilemtsü agi iba whale ya tzü telung nung sound pollution, industry balala nungi tzü tamajung yimokba, plastic chisemba mesüra tashidak kar ajanga asü asütsü kechiba süra temang tema nung yiruba zübu kecha mali,” ta Reefwatch India nung mongin Animesh Limaye-i ashi.
Mumbai tzükümtem nung timba ka jana tamajung agi sünga alir aser balakata tzüsem tesashi aruba mapang jana tonne aika nungteta yutsür.
Tan ita tetenzüklena Tuticorin district, Tamil Nadu tzüküm nung tzüreptsü tatsü keta aliba whale tasü 45 pungtet aser whale 40 shi tzüküm nung masü alirtembo kümzüktet.
Ketdangsertemi ashiba agi, item whale tem ya Pacific ocean nungi kilometre aika aruba sülen Tuticorin tzüküm atong.