Mumbai nung arishi küm 12 tain tetsür chanu kati tanur aso

Mumbai, September 23 (Agencies) : Hombarnü Mumbai nung aliba JJ Hospital nung arishi küm 12 tain tetsür chanu kati tanur ka sogo.
Taküm July ita Chembur nung alir tanutsülaji ita tenet mashisa lir ta putet. Police-i la dang asüngdangya asüdang la tebu rabirsangi aiben la tashiyim agi raksatsü ta tanutsülai langzü. Iba o nung ajemdaker police-i taküm July ita tebuji apu saka pa tepuokdak lia asü.
“Tanurji orphanage ka nem agütsütsü atema tanutsülar kinüngertemi mulungogo” ta J J Hospital nung Head of Department of Gynaecology, obstetrician Rekha Davar-i osangbener dang ashi.
“Tanurji Cesarean section surgery ajanga aso aser temang touzükji seret 2.8 shi lir. Tanur o tetsü naprong neo-natal intensive care unit nung anepaludar aser tenaprong junga dang lir” ta Davar-isa ashi.
“Tanutsüla tepok nung tashitsü atua kangshiba atema Chembur nung doctor kati la nem painkillers agütsü aser idangji la tanur bena alibaji khenyongi memetet liasü. La tepok awakba sülen ang sonography agi aser idangji la mashisa aliba putet” ta tanutsülar kinünger kati ashiba olen Mumbai Mirror ajanga metetdaktsü.
Iba sülen tanutsüla tetsüi police tsüngdang ken o ka benok aser la kinungbo apu, ta Mumbai Mirror-isa metetdaktsü.