Mumbai nung Cyber expert Vijay Mukhi süogo

Mumbai, Aenjeti 10 (Agencies): Technology tsütsü mongin aser Information Technology indang kaket 80 dak tema zülur alisang, Vijay Mukhi ya Lower Parel (Mumbai) nungi Sangtennü (Tuesday) aonung ajungben temulungjang agi mapa meinyaki süogo. Pa arishi küm 61 liasü aser pa asüba ajanga IT (Information Technology) entrepreneurs, technocrats aser pa medemer noklang tema, anidaker aser IT nung kaketshir shirnoki C++ angazka liasü, parnok kanga taoksa aser temulung zürep tia nung yutsü.
1995 küm Videsh Sachar Nigam Limited ya kinü tanur ama internet tsütsü linük nung tenzükba mapang ka Vijay Mukhi-i India nung internet ya amshi tenzük; ibayongji pa dang tech evangelist, cyber expert mesüra internet guru ta ajar.
Founder member of Nasscom (National Association of Software & Services Companies) aser Onward Technologies Ltd nung CMD, Harish Metha-i ashiba agi, “1980s mapang nungi Vijay Mukhi ya kü medemer tajung. Pai teti technology tasentem atema kanga jangrabangra aser miema liasü. Onok teti Nepean Sea Road nung aliba par kidang ajurutepa technology indang külem kasa medemsortem den sensaksema liasü. Nasscom ya 1986 küm par kidang nungi tenzük.”
Mukhi ya FIST (Foundation of Information Security & Technology) nung Tir liasü, koba ajanga security dak sendakba tebilemtsütem nung telangzüba agütsütsü aser cyber crime aser cyber safety tsütsü nüburtem nem shisatsü agütsür.