Mumbai nung doctor tem longkak aitdang shiranger 135 asü

Mumbai, March 24 (Agencies): Bombay High Court tetuyuba nung ajemdaker Hokolbarnü Maharashtra nung aliba nija aser sorkar hospital tem nung doctor temi longkak aitba anentsü melungogo.
Tesüiba anogo pongunü tashi doctor tem longkak aitba mapang nung Mumbai yimti kija nungia shiranger 135 süogo.
Court tetuyuba nung ajemdaker Honibarnü nungibo anepdang 8:00 ako nungi sorkar hospital nung inyaker doctor temi mapa inyaktsü imlar.
Brihostibarnü High Court-i Maharashtra Association of Resident Doctors (MARD) dang mapa inyaktsüla mesüra mapa nungi anentsütsü, ta metetdakja liasü.
Chief Justice Manjula Chellur aser Justice G.S. Kulkarni nati, “Nenoki (doctor tem) iba onük ya tuluka kümdaktsüra nüburtemi arua nenok dak kongshitsü,” ta ashi.
BrihanMumbai Mumbai Corp (BMC)-i court dang, tesüiba anogo pongunü tashi doctor tem longkak aitdang Mumbai nung aliba sorkar hospital tem nung shiranger 135 süogo, ta metetdaktsü.
Hospital tem nung shiranger kinungertemi doctor tem dak teka sangshiba tatalokba kanga buloba anema Hombarnü nungi Maharashtra nung doctor 4,000 dak temai sorkar dang security meshia longkak aita liasü.