Mumbai nung ki 1000 rongtok, nisung 2 asü

Mumbai, Dec. 07 (Agencies): Tanü Mumbai, Kandivali kiyong nung aliba slum ka nung mi tulu adoka ki 1000 jungnüa rongtok aser iba mapang gas cylinder-a aika pokogo. Mi lendong nungsa nisung ana süogo, ta Municipal Corporation of Greater Mumbai (MCGM) osang ajanga ashi.
Cylinder mezüngbubaji anüngdang 12:30 ako meta apok. Iba mi enseptsü atema mi ensepdang amshiba gari 16 amshia ghonda pezü jungnüa tashi nung ang mi ensepa liasü. Iba tesem nungji godown aika liasü ta osang angazüker.
“Tanü 12.33 ako meta onok dangi phone call aru. Idangyongjisa fire tender 16, water tanker 12 aser fire brigade ketdangser 6 iba tesem jagi yok,” ta fire police ketdangser kati ashi.
Iba tesem nungji alir kati ashiba agi, pai ola tulu ka angashi, iba sülen 20-30 ben shi tapoktsü aika apokba ola angashia liasü.
Iba slum ji tesem kanga temesü kiyong ka nung aliba ajanga mi ensepba garitem jagi iba tesemji tonga moteti timtem ajurua liasü.