Mumbai nung tayimtsü tsükokba lendong nung nisung pongu asü

Mumbai, Aami/June 28, 2018: Tanü nikongdang Mumbai kübok Ghatkopar, Jivdaya Lane nung tayimtsü ka tsükokba noksa nung angur. Iba lendong nung nisung pongu asü.

Mumbai, Aami/June 28 (Agencies): Tanü Mumbai yimti kübok Ghatkppar nung Jagruti building anasa chartered plane ka tsükokba lendong nung nisung pongu asü aser nisung ana yiruogo.
Nisung 12 mentetba King Air C90 tayimtsüji Juhu airstrip nungi apusoa liasü aser nikongdang Ghatkopar kübok Jagruti Nagar tesem nung tsükok, ta police-i ashi.
Iba lendong atalokba tesem nungji tayimtsü nung mena alir pilot ana aser Aircraft Maintenance Engineers ana den tangar nisung ka, tasümang ajak agi pongu ngutetogo, ta police-i metetdaktsü.
Iba tayimtsü tsükokba bushisüngdangtsü atema DGCA team ka Mumbai-i ogo, ta DG Civil Aviation, B S Bhullar-i metetdaktsü. Paisa, Aircraft Accident Investigation Bureau-ia tayimtsü tsükokba kuliji bushitsü, ta metetdaktsü.
Iba tayimtsüji Uttar Pradesh sorkar meyong liasü, ta osang prokba dak sendakba nung, Principal Secretary Information, Avnish Awasthi-i, state sorkari iba tayimtsüji Mumbai nung UY aviation dang tamalen ayok, ta metetdaktsü.
“Allahabad nung iba tayimtsüji lendong atalokba sülen tayimtsüji ayoktsü atema tezüngzüktep ka agia liasü,” ta Avnish-isa ashi.
Lendong atalokba sülen police, fire brigade aser disaster management teams iba tesem jagi ao aser tasümangtemji Ghatkopar nung aliba Rajawadi hospital-i bener ao, ta ketdangser kati ashi.
Fire brigade ketdangser kati, “Tanü nikongdang 1:15 ako meta tayimtsü ka tsükokba osang control room nem metetdaktsü. Idangyongjisa ozü sepaitem iba tesem jagi oa teyaritep mapa inyaka liasü,” ta metetdaktsü.