Mumbai:Bank kima arishi küm 73 tain ka laoa asü

Mumbai, November 11 (Agencies) : Hokolbar nikongdang mapa nungi anisüngzüker alir nisung tain ka, tang joko magitsü ta asüba senpak melentsü atema bank kima tarensena nokdaker rongnung nokdaka lia ajungbena temulungjang tashidak atua laoa asü.
Ketdangsertem aser yangji aliba tenük küli angurtemi ashiba agi asür Vishwanath Vartak-a Mulund, north-east Mumbai nung aliba State Bank Of India branch nung sen kar melentsü tarensena nokdaker rongnung liasü ta ashi.
Anü kanga tesashi aser tatsük tali asüba agi, arishi küm 73 tain, Vishwanath ji tangola mesapui lao.
Nisung kari pa ajungshia shia arudaktsütsü merangdang saka pa tango mesashi anungji police aser ambulance dena tesemi aja.
Iba sülen tatsüka tang lir pa temulungjang mapa meinyakba ajanga süogo, ta osang aru.
Mumbai nung aliba Bank aser ATM balala nung anogo ananü tashi sen melentsü atema tarensena nokdaker nisung lakh aikati mena atatsü atema kecha anepalu masüba, tzü tajemtsü manguba aser metzü meshidak tesem maliba atema kanga ola adokteper.
Iba ama tensa ka nung tantsür tamburtem, mashisa alirtem mesüra temang nung timtem alirtem kanga okronger. Parnok-a lenmang aser bank kima nung anü agi puseta nisung tarensena nokkdakba nungji nokdangtsüsa akümer saka bank aser tesem anasa aliba ketdangsertemi kecha nunga meyarir.