Municipal election tebilemtsü

Tajunga ta ser bener aru nung tashidak agi süngerang ka tenji ama, Nagaland nung town committee dang liasüba nungi jenjang tulukati ajungketer Municipal aser town council akümtsü ozüng küma lateter bener aruba ya asenok asoshi tebilemtsüang tuluka kümogo. Municipal inyakyim nung tax sarutsü alinungji, ibaji magizüktetba agi tamasayongi Mokokchung nungbo magitet saka Kohima aser Dimapur Municipal den town council kümteta alidak tanga town-tem nungbo election  agia khen anabenkabo inyakdangogo. Ajisüaka, tetsürtem nema 33% agiteta municipal aser town council nung shilem agidaktsütsü asoshi assembly nung latetba den külemi ano election dak aketba maparen nung timtem aser jangramatem maparen aika sendaka aliba agi 2010  küm nungi ‘Local bodies’ election magitet arur. Atangji, Nagaland nung assembly election dang masü saka municipal aser town committee election agiba yimya yaa kanga majung, anungji itemji bilemdangbo magiang tajungba saka joko municipal aser town council alitsüla ta ozüng küma latetadoker asünungji, tawa Nagaland chief ministeri ashiba amato ibaji melira  center nungi town-tem renloka aotsü asoshi senotsü meyoker, iba jagi asenok akoksar. Ano, municipal aser town council alidak yimten nung shilem agitsü purtem aika nübortem tenzüktsü maongka mangur. 2010 jakdang municipal aser town council aliba ajanga anguba tajangzüka aika liasü aser ano inyakertemi ochimashi inyakba ajanga nübortema kanga akoksatsüogo. Ajisüaka, municipal aser town council junga aotsü maotsübaji council nung inyakertem dakji dang aket masü saka nübortem daka keta lir, anungji ketdangsertemi nübortem nüken tsübua ochishia aser nendaka inyaktsüsa nübortem saksalema aser wainshin meteta alitsüla. Joko, state sorkari metetdaktsüba ama municipal aser town council election aginungbo taküm 2016 küm November nungbo agitsüsa adoktsü. Ajisüaka, tang tebilemtsü kaji tetsürtem nem shilem 33% wazüka yutsütsü latetba telemtetba ya Naga nunger tebur lokti tentettemi magizüktetter, anungji Nagatsür o Naga nunger tebur na tsüngda tatsütep tulu adokogo. Atangji, state sorkari municipal aser town  council nung tetsürtem nem shilem 33% agütsütsü lemtetbaji supreme court nungia tetsürtemi aginüba amato parnok nem 33% ji agütsütsü obendang agüja aliba agi agütsü südi. Anungji, taoba küm trok Nagaland nung local bodies election magiteti arubaji tetsürtemi 33% akangba ajanga magitet süra ano tangbo teburtemi tetsürtem nem shilem 33% agütsüba anema nokdakba agi state government terata tia ka nung yuja lir. Aji oda, Nagaland nung local bodies election  agitsü magitsüba ya tetsür o tebur na tsüngda raraba tongpang amai ka mekümdaktsüi tiyongtsü nung lenmang tajung ka bushitsüla. Atangji, Mokokchung nung municipal magitetba timtem yabo tetsürtem nem 33% agütsüba onük ya dang masü saka saru indang onük dena lir, anungji Mokokchung nung alir Aortema yamai atsütepa melii lenchi aruteptsüla. Tanü asenoki metettsüba kaji sorkar nem tax agütsübaji tebilemtsü mekümdaktsüi kechi atema agütsür mesüra agütsütsü ta asüba onüktemjiang ano ken süoktepa jembir tangatettep kati arutsü merangtsüla, kechiyong asen limajibo sota meyui indaktsütsüla aser mepu (ward) shia nung yimten aser nübor meimertemi item nungji shilem agitsüla. Ano, tetsürtem atemaji teti atema masü anungji khen mesüra anaben atema teburtemi 33% ji agütsüyonga tajungba dang asütsü. Aji mesüra tetsürtem electioni aitsü nokdangabo aka masüji teburtem den toktepa election aitsü aser iba denji election nung metoktepyonga local bodies nung tetsür 33% alitsüsa shimtettsüla. Atangji, Naga nunger teburtemi tentetba lokti tentettemi local bodies nung tetsür nem shilem 33 % agütsütsü memulungbajia tetsürtemi angatettsüla. Tanü ama yimten nung tetsür o tebur na tsüngda yimten maparen nung tatsütep adokba mapang, tetsüri mesüra teburi lenmang tajungba ka sayua aremzüktsü nüngdaker. Ibaji atema tamasa teburtemi aremzüktsüla saka teburtemi maremzükra tetsürtemibosa aremzüktsüla. Iba jagi dang asen lima tetsükdak melii renloktsü.