Municipal Elections 2017 January nungi tenzüktsü: TR Zeliang

November 2, 2016 nü Chozuba Town Council nüngshilung semzüktsüba sülen Nagaland, Chief Minister T.R Zeliang, Speaker Chotisuh Sazo, Cabinet Minister tem- Y Patton aser Yitachu nungeri tanga ketdangsertem den külemi agiba noksa ka angur.

Chozuba (Phek), November 03 (TYO): Tanü Bodhbarnü Phek district kübok Chozuba Sub-division Local Ground nung Nagaland Chief Minister, TR Zeliang-i state nung 29buba Town Council, Chozuba tenzüktsüogo; iba sentong nung Nagaland Assembly Speaker, Chotisuh Sazo-a dena liasü.
Iba sentong nung jembidang Chief Minister-i, “January 2017 nungi opposition maliba  tesemtem nung Urban Local Bodies elections agitsü, anungji nübortemi sorkar den yariteptsü mepishir, kechiyong ibaji ajanga dang terenlok mapa inyaktettsü,” ta ayongzük.
Naga yimten tebilemtsü atema olen ka jembidang T.R Zeliang-i “Naga nunger rarashia raraogo anungji ken o jembiba ajanga teti atema Naga nungeri yimjung ajanga lenmang bushitsü mapang tongogo.” ta ashi.
Paisa, “Naga nunger yimten tebilemtsü onükji yimjung lenmang ajanga dang latettsüla, aser kodang ibaji latetdir prangpong amshiba sobalibaji putiotsü ka dang akümtsü,” ta shisem.
Tebilemtsü onük tekaraba nung latettsüji kanga tongtibang, ta shia Chief Minister-i, Naga nungeri ano talangka atatsüsa kümra tang aliba telok teku den ano telok tali adoktsü akok, aser ibaji ajanga nüburtem timtemtsü, ta ashi.
“Takoksang Tsüngrem teyari aser temoatsü agi tia kaa tangbo state sorkar nunga opposition mali. Naga yimtenren onüka Naga nungeri agizüktettsüsa tekaraba nung latettsü onoki imlar,” ta TR Zeliang-i ashi.
Sobaliba inyakyim aser Arrla 371 (A) dak sentakba nung Chief Minister-i, Village Council atema Village Council Act elections ji sobaliba ozüng nung aliba ama agir saka town council elections jibo ward sasep nung electoral roll renema aliba ama agitsü, ta ashi.
“Ibaji agizüka lir aser asen jila kar nungbo yamaji benshidar,” ta paisa ashi.
Paisa ashiba agi, Nagaland Municipal Act ya 2001 küm agizük aser tetsürtem atema menden shilem 33 lemzükja 2006 küm iba Act yanglushi.
Urban Local Bodies election dak sentakba nung pai, sorkari 2017 January ita nungi opposition maliba tesemtem nung elections agitsü, ta shia nüburtem dang sorkar den amalitepa lidaktsüner kechiyong yimtsüng aser Municipals kübok maliba jila tilatem terenlok iba küboki maiter, ibayongji terenlok nung tesülen atsüngzüka lir, ta ashi.
Kasa sentong nung NLA Speaker, Chotisuh Sazo-ia Chozuba Town Council agizükba atema Chief Minister, cabinet züngsemtem aser Municipal Affairs Parliamentary Secretary, R Tohanba nunger dang pelaba lemsatep.
Paisa, state nung Chozuba ya jila tejenten rongnung ka lir saka terenlok kanga anünga lir, ajisüaka town council ta sangdongba ajanga terenlok mapa tekaraba nung akatsü imlar, ta ashi.
Kasa sentong nung Chairman Nagaland Honey Mission, Pusazo Luruo, taoba mapang Women Commission chairperson, Sano Vamuzo aser Vaprumu Demo nungeria jembia liasü.
Iba sentong ya Phek Deputy Commissioner, Murohu Chotso lenisüba nung agi, Chozuba Area Baptist Church Council Chairman,Vekusa Lohe-i meshiteta sarasadem aser Chozuba Town Baptist Church CYE lanurtemi ken tajung ka aten.
ADC Chozuba, Polan John-i okila jembi aser Advisor CPRO, Rudutso Vasa-i tepela anküp o jembi aser Chozuba Village Baptist Church Pastor, Vesavo Shijoh-i sarasadema iba sentong tembang.
Iba sentong nung Home Minister Y Patton, School Education & SCERT Minister, Yitachu, Deputy Speaker, Imtikumzuk den sorkar ketdangsertem aser tongti nisung aika dena liasü.