Municipal nung tetsürtem menden 33% angutsü latet

November 24, 2016 nü Nagaland Legislative Assembly Secretariat nung 12 buba Assembly session agidang tangokba noksa ka angur.

Kohima, Nov 24 (TYO) : Nagaland nung tatar senden 2012 küm September 22 nü amendang tetsürtem nem municipal aser town council nung menden 33%  magütsüi alitsü latetba pangzüng ka tanü Brehostibar nü Nagaland tatar senden nungsa agienogo, anungji tang nungibo municipal aser town council nung tetsürtem asoshi menden 33% shiteta yutsütsü aser yangjibo tetsürtem dang tokteptsü.

Iba pangzüng ya latettsü asoshi Parliamentary Secretary, Municipal Affairs, Economics & Statistics, Wb.R. Tohanba-i yakanü Mongolbar nü tatar senden mezüng nü benok aser Independent MLA Wb,Thomas Ngullie-i memulungi senden nungi oadokba dak alaka tadener tatar ajaki mulunga iba pangzüngji tanü Brehostibar nü latet.

Nübortemi memulungi tatar senden nung tetsürtem nem urban bodies nung 33% agütsütsü asoshi  pangzüng latettsü agibo tamasa nübortem den shisalemsatepmatsüla ta Independent MLA N. Thomas Ngullie-i metetdaktsü.

Tetsürtem nem yimten nung shilem balaka wazüka yutsütsüba onük ya Lok sabha nunga pangzüng melatetti lir aser Nagaland nunga iba onük ya tongtibang akümba agi taoba government nunga ken o kanga junga lemteper Select Committee ka nem nungloktsü. Iba Committee yagi Naga nunger kin aser loktiliba tentetttem den ajurua shisalemsateper külen, iba maparen ya khen yua ata tajungba asütsü ta tebilemba agütsü aser yangji ajemdaker tatar senden nung  2012 küm September 22 nü latet.

“Tanübo asenoki iba telemtetbaji aritepa agientsü meranger saka 2012 küm latetba nungji medokmeperi kar danga lira ano khen nübortem den shisalemsateper inyaktsüla,” ta Thomas Ngulli-isa ashi.

“Iba pangzüng renemtsü asoshi telok kari takangba agüja lira, parnok nemjiang angatetdaktsütsüla, ” ta paisa ashi.

Ashiko, government-i municipal aser town council tentetba sülen center nungi senotsü teyari aginür südi mesüra taruba election asoshi renemer asütsüa akok ta Wb.Thomas Ngulli-isa ashi.

Iba mapang Chief Minister T R Zeliang-i pa mulung akoktsü meranga ashidang, tang ya Nagaland tatar senden nung opposition mali ajak government nung dena lir, anungji ajak ka küma longjemer iba ama telatetba ya agitsüla ta metetdaktsü. Ajisüaka, Thomas-i ashiba agi, pa dakbo government-i opposition dak benshiba dang nungi tamajungba benshir, anungji pabo opposition asüyonga tajungba dang ta shir senden nungi oa adok.

Iba kasa senden nungsa tatartem rongnungi Minister Yitachu, Parliamentary Secretaries Deo Nukhu, Levi Rengma, Hukavi aser MLA Mmhonlumo Kikon aser G. Kaito Ayeh nungertemi tetsürtem nem 33% wazüka yutsüba onük nung mangatetba kar asügdanga liasü.

Tatartemi jangjashinüa asüngdangba langzüa ashidang, tatartemi 2012 küm September 22 nü latetba ken o anema Naga Mothers’ Association (NMA)-i Supreme court nung agüja lir ta Tohanbaisa ashi.

2012 küm tatar senden nung latetba pangzüngji kasa tatar senden ajanga magienrabang, tatartemiang temzüng ozüng anema inyaker amato asütsü aser government-a iba ken o yagi maneni timatemtsü ta paisa metetdaktsü.

Kasa onük nung, Chief Minister T R Zeliang-ia mapang tatsüka agia jembidang, tetsürtem nem yutsüba menden mesüra ward nung tetsürtem rongnung tetokteper shinga melira, anosa tetsürtem nem mapang agütsütsü aser tetokteper melira, repranger tetsür ka shimtsü ta metetdaktsü.

Iba  ken o lemtep temer külen Speaker Chotisuh Sazoi telok nem agizüka ayutsü mapang agütsü aser ajaki mulunga agizüka ayu.