Municipal ozüng meyanglushi tashi election magidaktsütsü: Ao Senden

Mkg. Jan. 11 (TYO) : Tang lateta aliba Nagaland Municipal ozüng nung meshitaki aliba ya memetongshi tashi municipal aser town council magidaktsütsü aser iba maparen ya matem tashi inyaktsü atema ‘Presidential Council’ nem nungloktsür, ta Ao Sendeni metetdaktsüogo.
Tanü Bodbar nü Ao Senden Federal Assembly amenba mapang, municipal aser town council election dak sendakba maparen nung tang kechi lateta lir, iba telemtetbaji akangshir aser shirnokisa Ao Sendeni ashiba mangai municipal aser town council election-i aitsü asoshi tenüng agüja lir, item nisungtem ajaki January 17, 2017 anogo tashi nung pei tenüng meyipa agitsüla, aji mesüra lateta akaba ama Ao senso nungi küm 30 jendoktsü, ta nenshia metetdaktsüogo.
Ao senso nung jendoker aliba mapang, pa mesüra laji Aor aser Naga nunger lokti tentet kecha nunga shilem magitsü aser ibaji dang masü government aser private mapa nunga Aor ka ama meinyakdaktsütsü, ta Ao Sendenisa metetdaktsü.
Ao Sendenisa Hombarnü Nagaland minister, Wb.Nuklutoshi dang Ao lima toktsür aotsü metetdaktsüba dak aketba maparen nung, pai Aor mulungba anema inyakba ajanga yamaji inyaktsüsa aküm ta jangjashitsü.
Wb.Nuklutoshii Changtongya town council nung election nung idaktsütsü asoshi candidate anidena senzü aser Changtongya nung nomination paper magütsütetba agi Tuli nung agütsütsü alu saka yangji nübortemi nokdangba ajanga magütsütet, ano iba sülena kasa tasa atonga Chuchuyimlang town nung nomination agütsüdaktsütsü merangba osang jangjaogo, ta Ao Sendenisa metetdaktsü.
Iba ama Changtongya town council election nung idaktsütsü asoshi candidate-tem anir jajaba mapang nübortemi pa den senzüba gari ajak apu aser yangji candidate-temji liasü. Iba ama osang angashia nübortem kanga jashi aser pa dak teka aitsü tashi lemtet, anungji iba anogo nungji pa taküm aser tensa tia kümzüktsü asoshi pa agientsü atema telemtetba agia liasü, ta Ao Sendenisa metetdaktsü.