‘Munna Bhai MBBS’ Actor Vishal Thakkar samar bushir

Aenjeti/January 14, 2019 (Agencies): Actor Vishal Thakkar shiba Munnabhai MBBS nung shilem tila ka agia liasü, pa samara küm asem dak tema jungogo, ta The Indian Express sangdong ka ajanga metetdaktsü. Osang ajanga ashiba agi, 2015 December 31 nü theatre nung Star Wars: The Force Awakens reprangtsü asoshi Thakkar ao saka tang tashi kidangi meyipa marui lir.
Thakkar tatemsa pa tetong den Ghodbunder Road nung January 1 nü 11: 45 shi nung shoot ka atema Andheri aotsü asoshi autorickshaw ka sotba mapang nguogo, ta police-i ashi.
“Ozü jabaso dak kechi atalokar ni kecha memetet,” ta Thakkar tetsü Durga-i ashi. Küm asem sülena Thakkar kong alia mejangja.
Thakkar-i Facebook nung tatemsa December 31, 2015 nü ‘küm tasen salem lemstepba sülen pa phone switch off süadok. Osang ajanga ashiba agi, iba sülen pa indang phone khen danga melapok. Bank account nunga kecha inyakyim mesayur.
Taoba investigating officer Mahendra Puri, shibai pa samaba ken o Mulund police station nung benoka liasü, pai ashiba agi, parnoki mezüngbo pa tetong dak temulung melemi bilem, saka lai kuli agütsüba nung kecha tashishitsü mali.
Indian Express sangdong ajanga ashiba agi, Thakkar mesama tsüngda pa indang ex-girlfriend-i la dak tashiyim benshiba aser mejungi benshiba atema pa aija liasü. “Lai ozü ki mapang shia semdanga liasü. Künü tena külemi kidangi aru aser iba sülen tasüngnü lai police anir kidangi aru. Iba sülen tena tsüngda mangatettep aliba bentetadok,” ta Durga-i ashi.
Thakkar samaba ken o ya constable Rajesh Pandey-i achaayanga bushisüngdangdar, shibai pa indang noksa ka pan-India network ka nung post sütsüogo.
Thakkar-i Sab TV indang nüngtugu show Taarak Mehta Ka Ooltah Chashmah nunga shilem agiogo.