Murray aser Radwanska nati China open nung takok nguogo

Beijing, October 9 (Agencies) : Deobarnü China Open, tennis asayamong final asaya nung tebur rongnungi Andy Murray aser aser tetsür nungi Agnieszka Radwanska nati takok marok nguogo. Ibai Radwanska atema tanabuba China open takok marok lir.
Tena pronglai indang indang set ajak kokyonga tua pei pei asayaba nung takok angu.
Iba asayamong piyong tena prongi set ka tanga makok meli asayatetogo.
Tebur final asaya nung World no 2, Britain nunger Andy Murray-i 6-4, 7-6 (7/2) agi Grigor Dimitrov madak takok anguba ya pa atema taküm takok marok 5buba aser pa tennis asaya tenzüker takok 40buba lir.
Tetsür rongnung World no 3 Radwanska-i Britain tsür Johanna Konta madak 6-4, 6-2 agi takok angu. Ano tena ya tan ita tatemlen Singapore nung WTA Finals mapang ajuruteptsü akok.
Murray-i tanü iba takok anguba ajanga World no 1, Djokovic points 1,000 agi memenep kümogo aser pai takok nguyonga aonungbo taküm küm tatemlenbo No 1 jenjang tongtettsü.
Canada nunger Milos Raonic tetsüng teloktep yiruba agi quarter final masayatetba ajanga Bulgaria nunger Grigor Dimitrov semi final-i indang indanga ait aser pai Rafael Nadal madak takok ngur final tongteta tanabuba jenjang nung takok angu.
Ano külen Poland tsür Radwanska-i tan takok anguba ajanga la tennis asaya tenzüker takok 20buba agur kümogo.
Hombarnü tennis asayar temaba jenjang nung alirtem tenüng adokdang Britain nungi Murray aser Johanna Konta na tenünga temaba 10 rongnung densemtsü.