Murshidabad hospital mi lendong nung nisung 3 asü

Kolkata, August 27 (Agencies): Honibarnü West Bengal nung aliba sorkar indang Murshidabad Medical College & Hospital nung mi tulu adoka nisung asem mi agi rongset aser tanur 50 dak tema yiruogo.
Asürtem rongnung tawa asoba kinü tanur ka, shiranger ka kinünger aser hospital staff züngsem ka densema liasü.
Osang angazükba agi, iba miji air conditioning unit ka nungi mezüng adok, koba ajanga nisungtem taoksa nung jenshidang aika yiru.
Iba tatalokba kuli bushisüngdangtsü atema West Bengal Chief Minister, Mamata Banerjee-i luden ka tentettsü tuyuba den külemi Police, Health aser Fire department shia dang iba report agütsütsü tuyu.
Online ajanga  prokshiba video nung, mozükidang aliba nisungtem kümzüktsü atema nisungtem mozüki telungi aiba noksa angur. Iba mozükidang yipden nung ondaka mesakteti shirangertemji koma kümzük’ar mejangjar. Iba mozükidang mi adokba sülen tanur kar samar bushitepdar, ta osang angazüker.