Music director tejen Ravindra Jain süogo

October 09, 2015: Geet Gata Chal aser Chitchor film tem nung ken tesüngjem mejemsang music director, Ravindra Jain arishi küm 71 nung süogo.

Jain ya tezüngjang ajanga timtem agütsüba ajanga Mumbai nung aliba Lilavati Hospital-i anir oa anepalua liasü.

Pa mezüng Wockhardt Hospital, Nagpur nung anepalua liasü saka October 7 nü ambulance tayimtsü ka nung Mumbai-i anir aru. Yangji pa ghonda 24 dialysis agitsü tenzük.

Pa mapang talangka nungi temang nung timtema liasü saka Nagpur nung pai tamalen nungi nangzükba sentong ka nung adentsü asoshi oa liasü.

Pa manemba ajanga Deobar nü Nagpur nung kenten sentong ka nung shilem agitsü aliba magiteti akümba sülen Mumbai-i Brihostibar nü anir aru.

Pa asüba mapang kinungtsü Divya aser adianu Manindra na pa anasa liasü.

1970s mapang Jain-i ‘Chor Machaye Shor’, ‘Geet Gaata Chal’, ‘Chitchor’ aser ‘Ankhiyon Ke Jharokhon Se” film tem atema music mejemtsüa liasü.

Iba den külemi ano Randhir Kapoor-i direct asüba ‘Ram Teri Ganga Maili’, ‘Do Jasoos’, aser ‘Heena,’ film tem nunga tongti ken aika mejemtsüogo.

Jain-i 1980 aser 1990 tsüngda tar nunger otsü agi film yangluba aser television serial aika nung music mejemtsüba den külemi ano tan ang Shahid Kapoor aser Amrita Rao nati tongti shilem agiba Rajshri Production ‘Vivaah’ atema music mejemtsüa liasü.