Music Industry ya temulung tilar atema masü: Theja Meru

Kohima, Aami/June 28, 2019: RCEMPA, Jotsoma nung June 27, 2019 Brehostibarnü Open Solo Competition sentong agiba sülen Nise Meruno, Lino Awomi, Alobo Naga, MTF Advisor Theja Meru, Ajeen Sucha, Project Director MTF, Hovithal Sothu aser shilem agirtem külemi tangokba noksa ka yangi angur. 

Kohima, Aami/June 28, 2019 (TYO): RCEMPA, Jotsoma nung June 27, 2019 Brehostibarnü Music Task Force (MTF)-i Open Solo Competition ayongzüka liasü. Kijai atenba ken tetoktepba nung takok angurtemi National aser International sabang nung shilem agitsü asoshi maongka angutsü.
Iba denji külemi takok angurtemi Alobo Naga aser Nise Meruno na ajanga music aser ken tsütsü tesayuba agütsütsü asoshi maongka angutsü.
Iba ken tetoktepba sentong nung tetendangertemji nüngtugu musical artist Ajeen Sucha, Alobo Naga aser Nise Meruno nunger liasü.
Iba sentong nung jembidang MTF Advisor, Theja Meru-i pa küm 30 tashi musician ka ama ajangshia aruba nung ajemdaker, music industry ya temulung tilartem atema masü, ta ashi. Pai ashiba agi, khen khenbo music ya ghonda 10 nungi 12 tashi meranga bushitsüla.
Open Solo Competetion nung Theja-i takok angurtem nem tenüngsang agütsüba den külemi iba tetoktepba nung shilem agirtem dang, meranga aser nendaka bushitsü, yakyaka alitsü aser pei alizüng tongtettsü asoshi iba sabang ya tetenzüker ka ama asütsüla, ta pai ajungshi agütsü.
Kasa mapang State nung music industry nem tenüngsang agütsüdang, Meru-isa takok tulu angutsü asoshi lenmang shitak nung odar, ta shisem.
Maneni, MTF, Project Director, Dr. Hovithal Sothu-i, 2004 küm Nagaland nung iba music industry koma tenzüka liasü aser iba mapang nungi takok ngua renloka aruba indang rasaa ashi.
Sothu-i ashiba agi, Nagaland kisüng nung dang masü saka alima sabang nunga shilem agitsü asoshi jakdang sür aotsü tang mapangba ya lir. Iba denji külemi paisa, international aser national sabang balala nung musician timba nem shilem agitsü maongka agütsütsü nükjidong nung Open Solo Competition ya ayongzükja liasü, ta shisem.
MTF-i ayongzükba Open Solo Competition nung nisung 70 dak temai register süa liasü, kong screening agiba sülen nisung 40 shima liasü. Shilem agir 40 rongnungi Tongtien Longchar, Echungbeni, Hanlong L Konyak, Diezelhou Sothu, Saronthung Kikon, Chuba Imchen, Zito Nyekha, Binthu Newmai, Ngapgang aser Phangmei Konyak nunger shimogo.
Iba tetoktepba sentong nung nükpoker saka kententsü sempet tajung alir Lino Awomi-i ken ka tenlokja telok saksalemdaktsü. Iba Open Solo Competition ya Music-A, Audio Technica, Live Jam aser Music Performance indang RS Academia den Music Task Force longjemer ayongzüka liasü.