Music nung sen timba aazüker tetsürji Taylor Swift lir

November 03 (Agencies): Nüngtugu kentener, Taylor Swift-i küm ana jungnüa ken tasen mesaya, ajisüaka 2016 küm kentenba nung tetsürtem rongnung sen timtiba aazükba temaba jenjang nung la lir.
2015 küm June ita nungi 2016 June ita tashi nung arishi küm 26 Taylor Swift-i kentenba ajanga US sen million 170 tashi aazükogo.
Kasa mapang nung Adele-ia US sen million 80.5 aazüka liasü.
Taoba küm ka tsüngda Adele-ibo kensep tasen ’25’ sayaa liasü aser iba mapang nungi Adele-i alima sema kenten sentong maneni kadar.
“Taylor indang 1989 World Tour kanga takok anguba ajanga onok indang list (Forbes List) ajanga lai aika süngmangdaktsüogo,” ta list yanglusang, Zack O’Malley Greenburg-i sangdong ka ajanga metetdaktsü.
Kasa tarensen nung Swift sülen tanabuba jenjang nung Adele lir aser tasembuba jenjang nung Madonna lir.
2015 June ita nungi 2016 June mapang nungsa Madonna-i la indang kensep Rebel Heart atema alima sema kentena senzüba nungi US sen million 76.5 ajangzüktet.
Pezübuba jenjang nung Rihanna-i US sen million 75 aser pongububa jenjang nung Beyonce-i US sen million 54 ajangzükteta liasü.