‘Muslim kiralongrar’ ta amshiba ya tai lir: Dalai Lama

Guwahati, April 02 (Agencies): ‘Muslim kiralongrar’, ta amshiba ya kanga tai lir, ta Tibet nunger yimsü lenir, Dalai Lama-i tanü ashi.
“Yimjung alitsü asoshi ola adokba ya 21st century nung tashi taitba küma odagi aser alima ajunga nung raraba aser shisabulu tajemba kümdaktsütsü asoshi India-i kanga meranga inyaker,” ta lenir-i ashi.
‘The Assam Tribune’ küm 75 ajungba benjungmong aser ‘The Dainik Asom’ küm 50 ajungba benjungmong nung jembiba mapang, “Muslim kiralongrar, ta tenüng amshiba ya tai lir. Islam yimsü tejangja amangertem lir aser Koran-i tuyuba sülen shidak anidaker,” ta ashi.
“Mapa tamajung ya nisung kari inyaker saka iba ya ajanga kin ka tenüng teta mamshitsüla. Item nisungtem molungjang ya temeim aser aria bilemba agi koktettsüla,” ta paisa shisem.
“20th century mapang alima ajunga nung azüdokshi agi sünga nisung million 200 dak tali taküm samaogo. Iba ama tensa tanaben marudaktsütsüla. Azüdokshiba, tai maketer nisung tepsetba, tanurtem aya agi asüba…item ya asenoki sendoktsü makok. Item timtem ya asenoki aria bilemba aser ka ama bilemba ajanga samatsütsüla,” ta Dalai Lama-isa ashi.
“Iba mapa ya sarasademba kisüng agi makoktsü, saka nisung ka indang shisatsü tim lenmang nung amshiba ajanga kija-kibong, kin aser alima ajunga nung yimjung bener arutsü. 21st nung aliba nüburtem dak temeim aser aria bilemba shisatsü alitsü asoshi tesayuba balala alitsüla,” ta paisa shisem.
“Amangba aser yimsü kisüng agi alima nung yimjung bener marutettsü. Alima nung yimjung alitsü asoshi nisung ajak nem o inteptsü, bushisüngdangtsü, asameyangtsü aser shisadangtsü asoshi sabang yanglutsütsüla. Aser iba temelenshi bener arutsü asoshi India-i shilem tulu agitettsü, kechiyong India ya akhidang nungi azüdokshi maliba lima ka lir,” ta Tibet nunger lenirisa ashi.