Muslim nunger mapa inyaker shilem 33 dang lir

New Delhi, January 04 (Agencies): India nung tamangba yimsü balala rongnungi mapa inyaker shilem tajemtibaji, Muslim nunger shilem 33 shi dang lir, aser iba ya linük average work participation rate, shilem 40 dang nungi tajemba lir, ta osang ka ajanga ashi.
Ano Jains aser Sikhs nütsüng naprong nungi mapa inyaker shilem 36 lir. Dalit nunger timba ser Buddhist nütsüng timbai mapa inyaker, aser parnok mapa inyaker shilem 43 lir. Ano Hindu nungera mapa inyaker nütsüng shilem 41 lir.
2011 Census data nungi statistics ajanga India nung mapa inyaker million 482 nungi tamangba yimsü balala nung ajemdaker iba asadangba sayuogo.
Linük nung tamangba yimsü kar nungibo mapa inyaker kanga ajema aliba tongtibangtiba kuliji- tamangba yimsü kar nungbo mapa inyaker tetsür kanga ajema aliba ajanga lir.
Muslim tsür aser Sikhs tsür mapa inyaker shilem 15-ngu dang lir aser Jain nütsüng nungibo tetsür mapa inyaker shilem 12 dang lir.
Ano Hindu nütsüng nungi mapa inyaker tetsür shilem 27, Khristan nütsüng nungi mapa inyaker tetsür shilem 31, aser Buddhists nungi mapa inyaker tetsür shilem 33 lir.
Census data ajangasa, nisung kwi koba maparen nung ajemoka lir’ar sayur. Linük nung mapa inyaker shilem 55 aluyimba maparen nung ajemoka lir.
Muslim nunger shilem 41 aser Khristan shilem 40 aluyimba maparen nung lir. Kasa maparen nung Sikh nunger shilem 47 aser Buddhists shilem 54 lir. Ano aluyimba maparen nung shilem timba ajemoka aliba nütsüngji Hindu nütsüng, shilem 57 lir.
Jain nütsüngtem timbaka industry aser services nung inyaker. Iba den külemi kasa maparen nung Muslims aser Khristan tema aika lir.