Muslim nunger tanur ana dak tali magidaktsütsüla: Togadia

New Delhi, Sept 03 (Agencies): Tawa linük census osang nung Muslim nütsüng arenba nung ajemdaker Muslim nütsüng arenba nokdangtsü asoshi Hindutava tongti lenir anati jembiogo.

VHP Tir, Pravin Togadia-i Muslim nungertem tanur ana dak tali magidaktsütsü atema khangogo aser BJP MP, Sakshi Maharaj-ia Muslim nunger nütsüng yongsük arener, anungji parnok nem minority jenjang agüja alibaji agientsüla, ta ashi.

Taoba mapangtem nunga Maharaj-i Hindutva nung ajemdaker pa tangatetbatem jembiba ajanga mangatettep ken o aiben adokogo aser pai, district aika nung Muslim nunger majority lir, joko parnok nungi minority jenjang agientsüsa parnok nütsüng renlokogo, ta ashi.

“Parnok ya joko minority ka masü. Parnok ya joko ‘quarter’ (shilem 25) dak tali kümogo ta jembir. Kashmir nungbo parnok nütsüng shilem 90 dak tema lir. District aika nung parnok shilem 70, 80, 90 lir, anungji kechiba parnok nem minority jenjang agütsütsü,” ta paisa ashi.

You must be logged in to post a comment Login