Muslim nunger tasümang rongdoktsüla : BJP MP Sakshi Maharaj

New Delhi, February 28 (Agencies) : BJP MP, Sakshi Maharaj-i ashishitep onüktem kanga jembir aser tang-a pai Muslim nunger tasümangtem ali nung aremtsü melena rongdoktsüla ta ashishitep olen ka jembiogo.
Leper atema tesem peria mali, anungji leper yanglutsü atema tenokdangba agütsütsüla, ta Sakshi-i ashi.
“Kabristaan (leper) mesüra Shamshaan (crematoriums) nüngja ajayonga, nisung shinga ali nung maremtsüla. Iba linük nung Hindu nunger temeshi nisungtem crore 2-2.5 shi lir aser parnok asüba sülen nüngshilung ka ka alitsü tetemsü. Iba atema ali nüngdaker. Linük nung Muslim nunger crore 20 lir, parnok ajak leper ka nüngdaker. Iba atema Hindustan nung ali kong lir” ta yashi Unnao nung public rally ka nung o jembidang pai ashi.
BJP MP Sakshi-i iba onük jembiba atema Congress Party-i Mongulbarnü pa aitsüogo.
Uttar Pradesh nung tang assembly elections tagidak lia pai lokti nung telemsa adokdaktsütsü atema iba onük jembiogo ta Congress-i aitsür.
“Tamangba yimsü ajaki pei teinyaktsü sülen anidaker. Leper ka nüngdakra, ibaji yanglutsü. Tasümang arongdak ka nüngdakra, ibajia yanglutsü” ta Congress lennir Sandeep Dikshit-i ashi.
Ano külen, Samajwadi Party lennir Naresh Agarwal-ia ashiba agi, “Sakshi Maharaj-i jembiba onükji Hindu aser Muslim nunger tsüngda telemsa tuluba kümdaktsütsü atema lir.”
“Iba ajanga BJP tezü atangba sayur. Parnoki jembiba onük kecha mali” ta Agarwal-i ashi.
Tan ita tetenzüklen, Prime Minister Modi-i Fatehpur nung election nüboyimba sentong ka nung, Kabristaan (leper) aser Shamshaan (tasüngmang arongdak) atema ali agütsüba nung bendanga mamshitsüla ta shia liasü.
“Nenoki yimtsüng ka nung Kabristaan yanglura, Shamshaan-a ka yanglutsüla. Ramzan mapang electricity timtem melii agütsüra, Diwali nunga kasaji agütsütsüla. Inyakyim bendanga meinyaktsüla” ta Modi-i iba mapang ashi.