Muslim nunger tekülemdak mashi memelatsüla

Dimapur, October 13 (TYO) : Dimapur nung Muslim nungertem mezüpelang mesüi bentetbenteta alitsü asoshi taoba ita September 17, 2017 nü to Muslim Council Dimapur ajanga Dimapur telongtet nung aliba tekülem kitem Jame Masjids (permanent) aser Pangajana Masjids(temporary) committee purtem jadena senden ka liogo aser item tenla kitem ajakji MCD-i kanga junga mita reprangtsü lemtetogo.
Talisa khen atema tekülemdak asütsü mesemetetba Pangajana masjids mapang tatsüka tsüngda aika akümba ngua, itemji jungjunga reprangdangtsü aser MCD kübok alitsü lemtetogo ta MCD ajangasa metetdaktsü.
Pangajana Masjid-ji reprangdanger külen nüngdak reprangtetra, itemji parnok alidak Jame Masjids küboki aittsüla ta Dimapur nung Muslim telongjemisa metetdaktsü.
Iba maparen dak sendakba nung, Muslim Council Dimapur nung Working president, Ahidur Rahman-i metetdaktsüba agi, Dimapur nung kija aser lokti shingaia MCD den masüngdangtepi pei li aser pei kidang Pangajana masjids meyangludaktsütsüla aser ano tekülem kintem kar danga shibangtsütsüsa adokra, item maparentem nungjia tashi angatepa inyakdaktsüner.
Iba maparen nung Dimapur nung district administration, GBs aser senso ajaki yaritep nung dang Muslim nunger bentetbenteta lia otettsü ta parnokisa metetdaktsü.
Ano, Dimapur nung khen atema yanglua aliba tekülemdak Imams (putir) meshim dang jangjashiteptsüla aser mongintemi dang interview agia shimtsü ta MCD ajangasa metetdaktsü.
MCD-isa Dimapur nung alir Muslim nunger ajak dang Dimapur DC-i metetdaktsüba ama, pei pei alidak kiyong nung GBs ajanga tenüng züluoktsüla ta mepishia metetdaktsüogo.