Muslim nütsüng kanga arener ta VHP-i jembiba Congress-i aitsür

New Delhi, September 07 (Agencies): Hombar nü Congress Party-i Vishwa Hindu Parishad (VHP) aija, parnoki tamangba yimsü tenüng nung linük nung telemsa adokdaktsür, ta ashi.

VHP-i Muslim nungertemi parnok nütsüng arentsü atema inyaker ta jembibaji khenyongi democratic masü, ta Congress-i ashi.

“Tamangba yimsü tenüng amer lokti nung telemsa adokdaktsütsü asoshi Vishwa Hindu Parishad-i yimya ka ama küma sangdong agütsür aser iba nungjagi parnok tajangzük angutsü meranger,” ta Congress lenir PL Punia-i osangbenertem dang ashi.

“Ni iba ya VHP dang asüngdanger, linük nütsüng ainba azüoktsü atema Muslim nungertemi meinyakbatemji kechi (?),” ta pai ashi.

“Tanur ka agitsü telemtetbaji nija ka melung. Anungji, VHP-i jembiba oji khenyongi democratic masü,” ta paisa ashi.

Tawa tamangba yimsü balala apir linük census sayaba nung ajemdaker Deobar nü VHP-i, linük nütsüng arenba azüoktsü atema tanga tamangba yimsütemi meranga inyakba nung yarisemtsü melen, Muslim nungeri parnok nütsüng arentsü atema inyaker,” ta aija liasü.